Спектакльләр, мастер-класслар һәм перформанслар: Казанда «Балалар бии» фестивале узачак

Әлеге чара бөтен Россиядән хореография коллективларын берләштерәчәк

Фото: «Балалар бии» фестивале матбугат хезмәте

Татарстан башкаласында 19-21 нче апрельдә беренче тапкыр заманча бию спектакльләре фестивале узачак. «УРАМ» экстрим-паркында казанлылар спектакльләр һәм перформанслар карый алачак, мастер-классларда, воркшопларда һәм түгәрәк өстәлләрдә катнаша алачак.

Фестиваль программасы Мәскәү, Санкт-Петербург, Самара һәм Казаннан режиссура һәм заманча бию өлкәсендәге белгечләр белән берлектә эшләнгән. Чираттагы чараның темасы – «Диалоглар». Тамашачылар һәм фестивальдә катнашучылар заманча бию турында сәнгать практикалары аша күбрәк белә алачак, төрле сәнгать төрләре арасында бәйләнешне табарга өйрәнәчәк.

Бию программасы кысаларында бөтен Россиядән килгән коллективлардан спектакльләр күрсәтеләчәк, аерым алганда, Чиләбенең «Энергия» командасы – «Прекрасное далеко» спектаклен, ә Ивановодан «Воздух» компаниясе «НорМы» номерын тәкъдим итәчәк. Новосибирскидан Glyptic Create коллективы «Падала звезда» спектаклен биеп күрсәтәчәк. Фестивальдә Казан студиясе – «Дорога из города» бию театры – «Внутри бури» спектакле белән чыгыш ясаячак.

Программага шулай ук перфолекторлар – лекцияләр форматын һәм перформансларны берләштерүче заманча бию өлкәсендәге профессионаллар ярдәмендә эшләнгән перформанслар; биючеләр Татьяна Тарабанова һәм Татьяна Щербаньның «Серьезный акт» спектакле кертелгән. Соңгысының концепция авторы – Швейцария хореографы Николь Сейлер. Моннан тыш, тамашачыларны Bereg бәйсез бию компаниясеннән Россиянең әйдәп баручы хореографлары Александра Конникова һәм Альбертс Альбертс белән берлектә төзелгән «Шизуку» спектакле көтә.

Программаның тулы расписаниесе фестиваль сайтында урнаштырылган. Чарага керү өчен алдан теркәлү зарур, дип хәбәр итә оештыручылар.

«Балалар бии» фестиваленә 2017 елда нигез салынган. Ул Мәдәни инициативалар Президент фонды ярдәме белән оештырыла. Берничә ел рәттән чара Мәскәү музейларында, «Трехгорка» мәдәният йортында, Милләтләр театрында һәм «ГЭС-2» мәдәният йортында үткәрелде.

Шулай ук укыгыз

Барлык яңалыклар