«Казан автобусында Яңа ел тавышы бул» акциясенә йомгак ясалды

23 котлау иң креатив дип танылды, алар ике маршрут салоннарында яңгыраячак.

Фото: vk.com/atprt

(Казан шәһәре, KZN.RU, 15 нче декабрь). Бүгенге көннән башлап Казанның ике автобусында «Казан автобусында Яңа ел тавышы бул» акциясе җиңүчеләренең котлаулары яңгыраячак. Иң иҗади дип 23 котлау танылды.

ТР АТП ассоциациясендә хәбәр итүләренчә, Яңа ел акциясе өчен махсус «ПАТП №2» предприятиесендә ике автобус бизәлгән. Алар иң популяр 45 нче һәм 46 нчы маршрутларга чыгачак.

Исегезгә төшерәбез, 16 нчы ноябрьдән 1 нче декабрьгә кадәр Казанда яшәүче һәркем, котлау яздырып, аудиофайлны ассоциация почтасына җибәрә алды. Шәһәрлеләрнең туганнарын, дусларын, хезмәттәшләрен һәм миллион халыклы шәһәрдә яшәүчеләрне җәмәгать транспортында бәйрәм белән котлау мөмкинлеге туды.

Ассоциация почтасына беренче котлау ТР Милли музее Кыш Бабаеннан килде. 381 нче балалар бакчасында тәрбияләнүче 5 яшьлек Нияз акциядә катнашучылар арасында иң кечкенәсе иде. Казан мәктәпләре укучыларыннан бик күп котлаулар килде. Җиңүчеләр арасында 21 нче гимназия укучысы, 187 нче лицей укучылары бар. 9 нчы мәктәпнең 9 «г» сыйныфы котлауны дүрт телдә – рус, инглиз, татар һәм кытай телләрендә җибәрде. Җиңүчеләр үзләренең котлауларын чәчмә формада да, шигырь белән дә яздырганнар, музыкаль композицияләр дә булды, мәсәлән, Виктор Цой җыры мотивына, шулай ук джаз Яңа ел композициясе яңгырады. Хәтта Канадада яшәүче Брайан Лич та үз котлавын җибәргән. Ул рус телендә «Үсте чыршыбыз урманда» җырын башкарды.

Җиңүчеләрнең тулы исемлеге сылтама буенча урнаштырылган.

Акция быел беренче тапкыр үткәрелде. Әгәр Казан халкы яңа проектны бәяләсә, киләсе елда котлаулар яңгыраячак автобуслар саны артачак. Фикерләр һәм тәкъдимнәрне ассоциациянең atprt2019@yandex.ru электрон почтасына җибәрергә мөмкин.

Шулай ук укыгыз

Барлык яңалыклар