Казанның яшүсмерләр клубы челтәре «Иң яхшысы – балаларга» дигән сыйфат билгесенә ия булды

«Яшүсмер» муниципаль бюджет учреждениесе беренче тапкыр мондый танылу алды

Денис Гордийко фотосы

Казанның яшүсмерләр клубы челтәре Россия Федерациясенең «Иң яхшысы – балаларга» дигән сыйфат билгесенә ия булды. «Яшүсмер» муниципаль бюджет учреждениесе беренче тапкыр мондый танылу алды һәм әлеге күрсәткеч шәһәрдәге яшүсмерләр ялын оештыруның югары дәрәҗәсен раслады. Дәүләт бүләге балалар өчен иң яхшы Россия товарлары һәм хезмәтләре тәкъдим ителә торган илкүләм программа кысаларында тапшырылды.

Сайлап алу комиссиясе учреждениеләрнең иҗади һәм спорт секцияләреннән алып «Бергә» һәм «Ачык ишекләр көне» кебек зур проектларның системалы эшен читтән бәяләгән. 14-35 яшьлек яшүсмерләр һәм яшьләр өчен барлык хезмәтләрнең бушлай оештырылуы мөһим роль уйнаган. Шулай ук бию, спорт, гамәли, техник, театр һәм башка юнәлешләрнең күптөрлелеге билгеләп үтелгән.

Сыйфат билгесе ике елга бирелә. «Яшүсмер» муниципаль бюджет учреждениесе билгеләп үткәнчә, бүләк югары эш стандартларын саклап калырга, яшүсмерләр клубы челтәрен үстерергә һәм Казан яшьләре белән эшләү тармагын өстенлекле эш юнәлеше итеп калдырырга этәргеч булачак.

Ел башыннан шәһәрнең барлык яшүсмерләр клубында 33 меңнән артык Казан яшьләре булган. Бу чорда яшьләр сәясәте учреждениеләре 2,6 меңнән артык чара үткәргән.

«Яшүсмер» муниципаль бюджет учреждениесе Казанның җиде районында яшәү урыны буенча 70 клубны берләштерә. Алар исәбенә 67 яшьләр клубы керә, бүгенге көндә шулар арасыннан 58 учреждение тулы көчендә эшли.

Шулай ук укыгыз

Барлык яңалыклар