«Зәкәт» хәйрия фонды карамагындагыларга 200 литр бал тапшырылды

Татлы бүләкне мохтаҗ гаиләләр һәм Татарстан мәдрәсәсендә укучылар алачак.

Фото: ТР мөселманнары Диния нәзарәте

(Казан шәһәре KZN.RU, 1 нче декабрь). РФ Мөселман эшмәкәрләре ассоциациясенең хәйрия фонды Татарстанның мохтаҗ гаиләләренә һәм мөселман уку йортларына 200 литр бал тапшырды. Балны ТР мөселманнары Диния нәзарәтенең «Зәкәт» хәйрия фонды барысына да тигез итеп бүлеп бирәчәк. Балны республиканың Биектау районының Сая авылындагы эшмәкәр тапшырган.

РФ Мөселман эшмәкәрләре ассоциациясе президенты Айдар Шаһимәрданов билгеләп үткәнчә, ассоциация «Зәкәт» хәйрия фонды һәм мәдрәсә белән инде күп еллар хезмәттәшлек итә. Узган айда РФ Мөселман эшмәкәрләре ассоциациясе 400 мең сумнан артык акча җыйды һәм таратты. Акча шул исәптән ислам мәгарифенә һәм фәненә ярдәм итүгә, мәчетләр төзүгә, сәүдә үзәкләрендә гыйбадәт бүлмәләрен эшләүгә юнәлдерелде, дип хәбәр итә ТР мөселманнары Диния нәзарәте матбугат хезмәте.

Мохтаҗларга ярдәм күрсәтергә теләүчеләр РФ Мөселман эшмәкәрләре ассоциациясе хәйрия фондының +7(986)902-06-06 телефоны буенча мөрәҗәгать итә алалар.

Шулай ук укыгыз

Барлык яңалыклар