Иртәгә ТР Милли музеенда «Моабит дәфтәрләре»нең төп нөсхәсен күрсәтәчәкләр

Чәчәкләр салу, тематик экскурсия, патриотик проектларга старт бирү: Казанда Муса Җәлилнең тууына 119 ел тулуны билгеләп үтәчәкләр

15 февральдә, Муса Җәлилнең туган көнендә, Татарстан Милли музеенда Казан халкы һәм кунаклары нацист әсирлегендә язылган шигырьләрнең оригиналь кулъязмасын күрә алачак.

11:00 дә 1 май мәйданында герой-шагыйрь һәйкәленә чәчәкләр куелачак. 12:00 дә Милли музейда традицион «Төп нөсхә көне» башлана: ел саен Муса Җәлилнең «Моабит дәфтәрләре» тантаналы рәвештә музей фондларыннан чыгарыла һәм махсус витринада урнаштырыла.

Шагыйрь Берлинның Моабит төрмәсендә язган җыентык эчтәлеге һәм торышы буенча 93 төрле шигырьне үз эченә ала – нацистларның җинаятьләреннән алып юмористик әсәрләргә кадәр. 58 ел элек Милли музейга дәфтәрне Муса Җәлилнең хатыны Әминә ханым тапшырды.

Музейның конференц-залында «Мин яшенле яңгыр аша атладым...» күргәзмәсе ачылачак, анда шагыйрьнең шәхси әйберләре, документлары һәм фотосурәтләре, аның китаплары урнаштырылган. Беренче тапкыр үзе яшәгән, эшләгән һәм иҗат иткән урыннар буенча «Җәлил Казанда» җәяүле экскурсиясе узачак. Җыелу ноктасы – Горький урамындагы 17 нче йорт (шагыйрьнең музей-фатиры). Аннан Муса фронтка китә. Гид хикәясе аудиоматериалларны тыңлау белән бергә барачак. Бу – Нәҗип Җиһановның «Җәлил» һәм «Алтынчәч» операсыннан килгән арияләр, шулай ук Айрат Арслановның шигырьләре. Экскурсия 13:30 да башлана, катнашу өчен теркәлү кирәк.

15:00 сәгатьтә Муса Җәлил музей-фатирында туган ягының тарихы белән мавыгучы балалар өчен патриотик проектлар старт ала. 8 – 11 яшьлек 7 катнашучы Муса Җәлил музеенда экскурсия үткәрәчәк. Шуннан соң «Җиде тарих» проектын тәкъдим итәчәкләр: музей волонтерлары гаиләләре Бөек Ватан сугышы чорындагы үз реликвияләрен күрсәтәчәк, ә сөйләүчеләр балалар булачак, дип хәбәр иттеләр ТР Милли музее матбугат хезмәтендә.

Шулай ук укыгыз

Барлык яңалыклар