Казан педагогларының өчтән бере диярлек – яшь укытучылар

Кадрлар мәсьәләсен хәл итү өчен мәктәпләрне тәмамлаучылар белән педагогик белгечлекләр буенча максатчан укуга сайлап алу эше җайга салынган.

Фото: Денис Гордийко

(Казан шәһәре KZN.RU, 26-нчы гыйнвар, Алена Мирошниченко). Шәһәр мәктәпләрендә балалар саны арту сәбәпле, башлангыч сыйныф, математика, рус теле һәм физика укытучылары җитми. Кадрлар дефицитын хәл итү өчен мәгариф учреждениеләре Казан педагогика көллияте һәм КФУ белән хезмәттәшлекне җайга салдылар. Педагогик белгечлекләр буенча максатчан укуга сайлау буенча мәктәпләрне тәмамлаучылар белән эш алып барыла. Бүгенге көндә 108 максатчан студент 1-5-нче курсларда белем ала, дип хәбәр итте Башкарма комитет җитәкчесе Рөстәм Гафаровка ел нәтиҗәләре турында хисап барышында мәгариф идарәсе җитәкчесе Ирек Ризванов.

Казан мәгариф системасында 30 меңнән артык кеше эшли, шул исәптән якынча 17,5 мең педагог. Аларның өчтән икесе югары яки беренче квалификация категориясенә ия. Укытучыларның өчтән бере диярлек – яшь белгечләр, дип сөйләде Ирек Ризванов.

Даими рәвештә Казан укытучылары төрле дәрәҗәдәге һөнәри конкурсларда җиңүчеләр һәм призерлар булалар. Әйтик, «Ел укытучысы – 2020» республика конкурсында шәһәр арсеналында 9 җиңүче булды. «Ел тәрбиячесе» номинациясендә казанлылар бөтен пьедесталны яуладылар, ә җиңүче Юрий Шулятьев агымдагы елның февралендә Бөтенроссия конкурсында республика данын яклаячак.

Шулай ук укыгыз

Барлык яңалыклар