Быел 3 меңгә якын татарстанлы коляскалар һәм протезлар сатып алу өчен Россия Социаль фондының электрон сертификатларыннан файдаланган

Әлеге максатларга 233 млн сумнан артык акча бүлеп бирелгән

Фото: Марат Мөгыйнов

Ел башыннан 3 меңгә якын татарстанлы техник тернәкләндерү чараларын һәм протез-ортопедия эшләнмәләрен сатып алу өчен Россия Социаль фондының электрон сертификатларыннан файдаланган. Әлеге максатларга 233 млн сумнан артык акча бүлеп бирелгән.

Электрон сертификат буенча техник тернәкләндерү чараларының 300 дән артык төрен сатып алырга мөмкин. Моңа кресло-коляскалар, протезлар, ортезлар, абсорбацияләүче киемнәр һәм башкалар керә. Алар арасында индивидуаль җитештерүне таләп итә торган эшләнмәләр дә бар. Махсус чаралар каталогы сылтама буенча бастырылган.

Электрон сертификат ярдәмендә кирәкле эшләнмәләрне сигез көн эчендә алырга була, ә дәүләт контракты буенча тәэмин итү, гадәттә, өч айга кадәр сузыла.

«Сертификат алу хокукына инвалидлар, җитештерүдә килеп чыккан бәхетсезлек очракларыннан зыян күргән яки һөнәри авырулардан интегүче гражданнар ия. Сертификатны дәүләт хезмәтләре порталы аша рәсмиләштерергә, Социаль фондның клиент хезмәтләрендә яки күпфункцияле үзәкләргә мөрәҗәгать итеп алырга мөмкин. Мәҗбүри шарт – теләсә кайсы банкның «Мир» түләү системасы картасы булу», – дип ачыклык кертте Россия Социаль фондының Татарстан буенча бүлекчәсе идарәчесе Эдуард Вафин.

Махсус хәрби операциядән демобилизацияләнгәннәр өчен быелдан башлап Социаль фонд электрон сертификатларны проактив рәвештә чыгара, димәк, гариза тапшыру таләп ителми.

Кызыксындырган сорауларны +7(800)100-00-01 телефоны (шалтырату бушлай) аша бирергә мөмкин, дип хәбәр итә ведомствоның матбугат хезмәте.

Шулай ук укыгыз

Барлык яңалыклар