Эпидемия сезоны башланганнан бирле талпаннар тешләү аркасында 2 меңгә якын казанлы медиклар ярдәме сорап мөрәҗәгать иткән

Бу узган елгы күрсәткечләрдән 1,6 тапкыр артыграк.

Фото: Марат Мөгыйнов

(Казан шәһәре KZN.RU, 29 нчы август). Эпидемия сезоны башланганнан бирле Татарстанның медицина оешмаларына талпаннар тешләгәннән соң 8084 кеше мөрәҗәгать иткән, шуларның 1949 ы – Казанда яшәүчеләр. Бу узган елның шул ук чоры белән чагыштырганда 1,6 тапкыр күбрәк һәм уртача еллык күрсәткечтән 1,3 тапкыр артыграк.

Талпан энцефалиты буенча республиканың 30 административ территориясе, шул исәптән Казан да эндемик булып тора. Бу территорияләрдә талпан тешләү очракларының 90,9% ы булган. Очраклар республиканың барлык муниципаль берәмлекләрендә, Апас районыннан тыш, теркәлгән. Шул ук вакытта тешләү очракларының күбесе Казанда һәм Чаллыда теркәлгән.

Республикада эпидемия сезоны башланганнан бирле кешеләрдән алынган 1794 талпан тикшерелгән: иксодлы талпан боррелиозы кузгатучы 558 ендә (зыян күрүчеләрнең гомуми саныннан 31,1%) бүленгән, талпан вируслы энцефалитын кузгатучы табылмаган.

Татарстанда 2064 гектардан артык мәйданда талпанга каршы эшкәртү үткәрелгән, шул исәптән 661 гектарга якын җәйге сәламәтләндерү оешмалары территорияләре эшкәртелгән, дип хәбәр итә Россия кулланучылар күзәтчелегенең ТР идарәсе матбугат хезмәте.

Быел республикада 3939 кеше, шул исәптән 545 бала талпан энцефалитыннан прививка ясаткан.

Талпан тешләгән очракта, бөҗәкне алу өчен медицина оешмасына мөмкин булганча тизрәк мөрәҗәгать итәргә кирәк. Шуннан соң, энцефалитны профилактикалау кирәкме-юкмы икәнлеген билгеләү өчен аны лаборатор тикшеренүгә илтеп бирү сорала. Медицина ярдәме сорап мөрәҗәгать итү мөмкинлеге юк икән, талпаннарны үзегезгә алырга кирәк. Тешләнгән урынны теләсә нинди чара (спирт яки йод) белән дезинфекцияләргә, шуннан соң кулларны сабынлап юарга киңәш ителә. Чыгарылган талпанны герметик рәвештә ябыла торган савытка төреп куярга һәм ТР Гигиена һәм эпидемиология үзәгенә (Сеченов ур., 13а) китерергә кирәк.

Шулай ук укыгыз

Барлык яңалыклар