Казанның автотранспорт предприятиеләрендә 1,4 меңгә якын хезмәткәр җитми

Шәһәрнең 19 автобус маршрутында кискен кытлык күзәтелә.

Фото: Денис Гордийко

(Казан шәһәре KZN.RU, 24-нче сентябрь). Казанның транспорт предприятиеләрендә 1399 машина йөртүче һәм кондуктор җитми. Хезмәткәрләрнең кискен кытлыгы шәһәрнең 19 автобус маршрутында (1, 2, 5, 10, 30, 33, 36, 46, 49, 53, 55, 62, 63, 68, 71, 72, 77, 90 һәм 91-нче номерлы) күзәтелә.

ТР Автотранспорт предприятиеләре ассоциациясендә билгеләп үткәнчә, Казан ташучылары пассажирларның җәмәгать транспорты эшен яхшырту турында теләкләрен ишетәләр, мәсәлән, алар арасында маршрутларга өстәмә автобуслар куярга, хәрәкәт графигын үзгәртергә яки җәмәгать транспортының эш вакытын арттырырга дигән теләкләр. Шуңа бәйле рәвештә, транспорт предприятиеләренең кадрлар бүлекләре хезмәткәрләр эзләүдә.

Моннан тыш, киләсе елда яңа кагыйдәләр үз көченә керәчәк – һәр автобус тахограф белән җиһазландырылачак, транспорт өлкәсендә эшләүче хезмәткәрләрнең хезмәт һәм ял тәртибе үзгәрәчәк. Автобуслар расланган график буенча йөрүләрен дәвам итсеннәр өчен аларның һәркайсына өстәмә рәвештә тагын бер машина йөртүче ялларга кирәк.

Казан автотранспорт предприятиеләренә эшкә казанлылар гына түгел, башка шәһәр һәм төбәкләрдә яшәүчеләр дә урнаша ала. Хезмәткәрләргә уңайлы эш графигы, социаль пакет, эш урынына кадәр бару һәм кире өйгә кайту өчен вахта тәкъдим итәләр, эшне территориаль сайлау мөмкинлеге бар, кирәк булганда тулай торак бирелә, дип хәбәр ителә Казанның транспорт сайтында.

Шулай ук укыгыз

Барлык яңалыклар