«Лапа дружбы» конкурсының икенче сезоны җиңүчеләренә 50 меңнән 200 мең сумга кадәр грантлар тапшырылды

Конкурс комиссиясе Казанның 91 мәгариф учреждениесеннән проектларны сайлап алды

Фото: Мәгариф идарәсе

(Казан шәһәре KZN.RU, 31 нче май). Бүген Казанның «Дом» экоүзәгендә «Лапа дружбы» грант конкурсының икенче сезонына йомгак ясадылар. Конкурс комиссиясе шәһәрнең 91 белем бирү учреждениесе проектларын сайлап алды. Җиңүчеләргә 50 меңнән 200 мең сумга кадәрле грантлар тапшырылды.

Казанның Мәгариф идарәсе матбугат хезмәте хәбәр иткәнчә, быел катнашучылар биш номинациядә эш тәкъдим иткән: «Эт – кешенең дусты», «Айболит һәм башкалар», «Инклюзив белем бирүдә зоотерапия», «Зооволонтер» һәм «Бир тәпиеңне, дустым!».

Мәсәлән, «Эт – кешенең дусты» номинациясендә 81 нче мәктәп җиңү яулады, 70 нче һәм 64 нче мәктәпләр икенче урынны алды, 355 нче балалар бакчасы һәм 48 нче мәктәп өченче урынны бүлеште. Катнашучылар йортсыз хайваннар проблемасына игътибарны җәлеп итү һәм караучысыз йорт хайваннары санын киметү өчен шартлар тудыру, шулай ук дүрт аяклы дуслар белән сакчыл һәм куркынычсыз аралашу темасына чаралар үткәрү өчен идеяләрен тәкъдим иттеләр.

Һөнәри юнәлеш бирү эше буенча белем бирү программаларының иң яхшы эшләнмәләре «Айболит һәм башкалар» номинациясендә тәкъдим ителде. Беренче урынны 122 нче балалар бакчасы алды, икенче урынны 36 нчы балалар бакчасы һәм «Заречье» өстәмә белем бирү үзәге бүлеште, өченче урынны 31 нче мәктәп һәм 20 нче гимназия алды.

Сәламәтлек мөмкинлекләре чикләнгән балалар белән эшләү программаларына багышланган «Инклюзив белем бирүдә зоотерапия» номинациясендә 7 нче балалар бакчасы җиңү яулады, икенче урынны 16 нчы һәм 350 нче балалар бакчалары алды, өченче урынны 81 нче мәктәп һәм 240 нчы балалар бакчасы бүлеште.

«Зооволонтер» юнәлеше буенча белем бирү оешмалары хайваннар белән эшләү, аларны күзәтү һәм карау күнекмәләрен эшләү буенча идеяләр тәкъдим иттеләр. Беренче урынны шәһәр балалар экология-биология үзәге алды, икенче урынны – «Сәяхәт» балалар өстәмә белем бирү үзәге һәм 37 нче гимназия, өченче урынны 102 нче гимназия һәм 153 нче мәктәп бүлеште.

«Бир тәпиеңне, дустым!» дип аталган яңа номинациядә катнашучылар конкурс темасына текст форматында видеоролик сценариен яки йортсыз хайваннар белән бәйле проблемаларны чагылдырган төрле сюжет линияләре белән 15 фотоны тәкъдим иттеләр.

Иң яхшы фотоларны 187 нче лицей тәкъдим итте, икенче урынны 95 нче балалар бакчасы алды. Сценаристлар арасында 57 нче мәктәп аерылып торды, икенче урында – 187 нче лицей.

Шулай ук укыгыз

Барлык яңалыклар