«Тукай эзләре буйлап»: Казанда Фәйзигә багышланган әдәби-музыкаль кичә узачак

Чара татар язучысы, драматургы һәм әдәбият белгеченең 120 еллыгына багышлана.

Фото: Денис Гордийко

(Казан шәһәре KZN.RU, 14 нче март). Казанда 17 нче мартта «Тукай эзләре буйлап» дип аталган әдәби-музыкаль кичә узачак. Чара татар язучысы, драматург, шагыйрь-лирик, либретто язучы, әдәбият белгече Әхмәт Фәйзинең тууына 120 ел тулуга багышлана.

Кичәне әзерләгәндә Әхмәт Фәйзинең мемориаль коллекциясеннән әйберләр кулланыла, алар Милли музей фондларында саклана. Алар арасында фотосурәтләр, кулъязмалар, документлар, шәхси әйберләр, афишалар, опера һәм балет программалары, шулай ук Шүрәле балеты персонажларының костюмнары бар. Презентация һәм видеохрониканы галимнәр һәм артистлар чыгышлары озата барачак.

Әхмәт Фәйзи Тукайны өйрәнү юнәлешенең башлангычында тора. 1930 елларда ул «Тукай Уральскида» һәм «Тукай» пьесаларында шагыйрь образын тудыра, аның турында кинолибретто өстендә эшли.

Гомеренең соңгы елларында Фәйзи Тукай язмышына кайта. Ул «Тукай» романы өчен материаллар җыя: Ленинград, Мәскәү, Алма-Ата тарихи архивлары фондларын куллана. Автор роман-дилогия уйлап тапкан. Шагыйрьнең балачагы һәм иҗатының башлангыч этабы турында беренче китабы 1952 елда чыга, ә икенчесе язылмый кала. «Тукай» романы өчен Фәйзи язучылар арасында беренче булып 1958 елда татар шагыйре исемендәге премия лауреаты була. Роман рус, казах, болгар һәм башка телләргә тәрҗемә ителгән, күп тапкырлар татар һәм рус телләрендә басылган.

Чара 14:00 сәгатьтә Г.Тукай урамы, 74 адресы буенча урнашкан Габдулла Тукай әдәби музеенда башлана, дип хәбәр итә ТР Милли музееның матбугат хезмәте. Керү ирекле.

Шулай ук укыгыз

Барлык яңалыклар