Татарстан авиакомпаниясе пассажирлары акчаны мошенниклардан саклау ысуллары турында беләчәк

Бортта кибермошенникларга каршы тору турында белешмәләр урнаштырылачак

Фото: Екатерина Красуцкая

(Казан шәһәре KZN.RU, 20 нче октябрь). Татарстан авиакомпаниясе самолетларында Россия Банкының кибермошенникларга каршы тору турындагы белешмәләре урнаштырылачак. Акция ел ахырына кадәр дәвам итәчәк, дип хәбәр итә РФ Үзәк банкының ТР буенча Милли банкы бүлекчәсе матбугат хезмәте.

Очыш вакытында пассажирлар интернетта үзеңне саклау кагыйдәләре нигезләре белән таныша алачак, шулай ук электрон җайланмаларны саклау ысуллары һәм кулланылган онлайн-мошенниклар схемалары турында беләчәк. Белешмәлекләр һәр пассажир утыргычы алдындагы урындык кесәләрендә урнаштырылачак.

Россия Банкының Идел-Нократ баш идарәсе бүлекчәсе – ТР буенча Милли банк идарәчесе Марат Шәрифуллин билгеләп үткәнчә, гражданнарның финанс культурасын күтәрү буенча масштаблы эш дәвам итә: «Безнең республика аэропортлары белән Россия Банкының белем бирү видеороликларын трансляцияләү буенча хезмәттәшлек тәҗрибәсе бар иде инде. Хәзер без Татарстан авиакомпаниясе белән пассажирларның киберграмоталылык дәрәҗәсен формалаштыру буенча уртак проектны башлап җибәрдек».

Очышлар географиясе Россия һәм халыкара рейсларны үз эченә ала. 2022 елда хәзер Россия Банкының мәгълүмати-агарту материаллары пәйда булачак самолетлар 8 меңнән артык рейс ясады. Уртача айлык пассажирлар агымы 20 мең кешедән артып китә.

Шулай ук укыгыз

Барлык яңалыклар