Казан аэропортында пассажирлар агымы язгы-җәйге чорда 30% ка арткан

Һава аланы хезмәтләреннән 3,5 миллионга якын пассажир файдаланган

Фото: Екатерина Красуцкая

(Казан шәһәре KZN.RU, 28 нче ноябрь). 26 нчы марттан 28 нче октябрьгә кадәр Габдулла Тукай исемендәге Казан халыкара аэропорты 3 млн 495 мең 9 кешегә хезмәт күрсәтте, бу бер ел элек булган чорга караганда 30% ка күбрәк. Бу хакта һава аланының матбугат хезмәтендә хәбәр иттеләр.

Аэропорт барлыгы 28 мең 526 рейска хезмәт күрсәткән. Бер ел эчендә бу күрсәткеч 18% ка арткан.

«Эчке һава линияләрендә пассажирлар агымы үсеше 19,9% тәшкил итте, 2 млн 490 мең пассажирга хезмәт күрсәтелде. Иң популяр юнәлешләр арасында Санкт-Петербург (+15%), Сочи (+23%), Минераль Сулар (+50%), Новосибирск (+47%) һәм Махачкаланы (+106%) аерып әйтергә мөмкин. Калининград даими рәвештә зур популярлык белән файдалана (+4%). Традицион рәвештә Мәскәүгә рейсларга ихтыяҗ зур (+2,3%) саклана», – дип хәбәр иттеләр матбугат хезмәтендә.

Халыкара юнәлешләрдә дә ташу күләме 68,9% ка арткан.

Ерак чит илләрнең иң популяр юнәлешләре Анталья (+46%), Истанбул (+67%), Дубай (+79%) һәм Хургада (+735%) булган. БДБ илләре шәһәрләре арасында иң зур үсешне Сәмәрканд (+618%), Астана (+329%), Алма-Ата (+215%), Баку (+159%) һәм Ашхабад (+130%) күрсәткән.

Пассажирлар агымының шактый үсеше күп очракта маршрут челтәрен киңәйтү һәм булган юнәлешләрдә рейслар санын арттыру буенча үткәрелгән эш нәтиҗәсендә ирешелгән, дип билгеләп үттеләр аэропортның матбугат хезмәтендә.

Шулай ук укыгыз

Барлык яңалыклар