Нарендра Моди: «Казанга килү бәхетенә ирешүемә шатмын»

Россия Президенты һәм Һиндстанның премьер-министры Татарстан башкаласында илнең Генераль консуллыгын ачу турында фикер алыштылар

Казан Кремленең Губернатор сараенда бу минутларда Россия президенты Владимир Путинның шәһәргә БРИКС саммитында катнашу өчен килгән Һиндстан премьер-министры Нарендра Моди белән сөйләшүләре бара. Яклар уздырыла торган сәяси вакыйганың әһәмияте, дәүләтләр арасындагы мөнәсәбәтләрне ныгыту, шулай ук Татарстан башкаласында Һиндстанның Генераль консуллыгын ачу турында фикер алыша.

«Безнең чакыруны кабул итүегез һәм шәхсән Казанга БРИКС саммитына килүегез өчен рәхмәтлемен. Монда без берләшмә эшчәнлеген алга таба камилләштерүгә һәм аның кысаларында күп планлы хезмәттәшлекне ныгытуга юнәлдерелгән күп кенә мөһим карарлар кабул итәргә тиеш. Һәм бу юнәлештә хезмәттәшлегебезне бик югары бәялибез, шуны күздә тотам, безнең дәүләтләр берләшмәне булдыру башлангычында торды», — диде Владимир Путин.

Россия президенты дәүләтләр арасындагы мөнәсәбәтләр аеруча өстенлекле стратегик партнерлык характерында булуын һәм актив рәвештә үсүен өстәде. «Без Казанда Һиндстанның Генераль консуллыгын ачу карарыгызны хуплыйбыз. Илнең Россиядәге дипломатик эшчәнлеген киңәйтү ике яклы мөнәсәбәтләрнең алга таба үсешенә ярдәм итәчәк», – дип ышандырды РФ лидеры.

Үз чиратында Нарендра Моди җылы кунакчыллыклары өчен рәхмәт белдерде: «БРИКС саммитында катнашу өчен Казанга, шундый матур шәһәргә килү бәхетенә ирешүемә шатмын». Һиндстан премьер-министры билгеләп үткәнчә, илнең Татарстан башкаласы белән тирән тарихи элемтәләре бар, ә монда Генераль консуллык ачылгач, мөнәсәбәтләр тагын да ныгый башлаячак.

«Сез БРИКС берләшмәсе белән ел башыннан бирле уңышлы җитәкчелек итәсез — моның белән мин сезне котларга теләр идем. Соңгы 15 ел эчендә безнең берләшмә үзенә аерым шәхес тудырды. Бүген дөньяның күп илләре БРИКСка кушылырга тели. Мин иртәгә саммит кысаларында безнең әңгәмәләрне түземсезлек белән көтәм», – дип белдерде Нарендра Моди.

Кремль сайтында хәбәр ителгәнчә, очрашуда Россияне Үзәк Банк башлыгы Эльвира Нәбиуллина, Тышкы эшләр министры Сергей Лавров, Хөкүмәт рәисенең беренче урынбасары Денис Мантуров, Президент ярдәмчесе Юрий Ушаков һәм башкалар тәкъдим итте. Һиндстан ягыннан Тышкы эшләр министры Субраманиам Джайшанкар, Премьер-министрның милли куркынычсызлык буенча Киңәшчесе Аджит Довал, илнең Россия Федерациясендәге Гадәттән тыш һәм Тулы вәкаләтле Илчесе Винай Кумар һәм башкалар катнашты.

Элегрәк Губернатор сараенда Владимир Путинның Яңа үсеш банкы башлыгы Дилма Руссефф белән очрашуы узды. Сөйләшү барышында яклар БРИКС илләренең милли акча берәмлекләрендә исәп-хисапларны арттыру турында фикер алыштылар.

Бүген Казан Кремлендә шулай ук Россия лидерының Көньяк Африка Республикасы президенты Сирил Рамапоса, КХР рәисе Си Цзиньпин белән әңгәмәләре планлаштырылган. Саммит кырларында ике яклы очрашулар алдагы ике көндә дә дәвам итәчәк.

Исегезгә төшерәбез, БРИКС саммиты Казанда 22—24 октябрь көннәрендә дәвам итәчәк. Бүген шәһәрдә рәсми булмаган төшке ашка килүче делегация башлыкларын каршы алалар. Иртәгә утырышлар тар һәм киңәйтелгән составларда планлаштырылган. Аннары делегация башлыкларының рәсми очрашу һәм тантаналы кабул итү тантанасы узачак. 24 октябрьдә «аутрич» һәм «БРИКС плюс» форматларында пленар утырышлар узачак. Саммит Россия президенты Владимир Путинның матбугат конференциясе белән тәмамланачак.

Саммитта катнашучылар Казанга килүләрен дәвам итәләр. Барлыгы, соңгы мәгълүматларга караганда, шәһәр 36 ил һәм алты халыкара оешма вәкилләрен кабул итәчәк. Шул ук вакытта 22 делегацияне дәүләт лидерлары җитәкләячәк.

Шулай ук укыгыз

Барлык яңалыклар