Стела ачу һәм парад репетициясе: Казан Җиңү көненә ничек әзерләнә

Бәйрәм алдыннан шәһәр урамнары буйлап тарихи хәрби техника колоннасы узачак.

Фото: Марат Мөгыйнов

(Казан шәһәре KZN.RU, 2 нче май, Диана Жиленкова). Быел Бөек Ватан сугышында Җиңүнең 78 еллыгын бәйрәм итү уңаеннан Казанда 140 ка якын массакүләм чара планлаштырылган, аларның бер өлеше инде башланган. ТР Министрлар Кабинетында узган брифингта шәһәрнең Җиңү көнен ничек каршы алырга әзерләнүе турында Башкарма комитетның Мәдәният идарәсе башлыгы Азат Абзалов сөйләде.

«Үсеп килүче буынны патриотик тәрбияләү – без башкара торган төп бурыч», – дип ассызыклады ул. Әйтик, төп вакыйгаларның берсе 4 нче майда Төньяк вокзал янында «Казан – хезмәт батырлыгы шәһәре» стеласын ачу булачак. 26 метр биеклектәге корылма Татарстан тыл хезмәтчәннәренең җиңүгә керткән өлешенең төп этапларын чагылдыра. Тантана «Хәтер бакчасы» акциясе белән дәвам итәчәк, анда катнашучылар агачлар утыртачак һәм шуның белән Бөек Ватан сугышы елларында һәлак булганнар истәлеген мәңгеләштерәчәк.

3 нче һәм 7 нче майда Меңьеллык мәйданында Казан гарнизоны гаскәрләренең ачык күнекмәләре узачак – беренчесе җәяүле исәпләүләр белән планлаштырылган, ә икенчесе – моторизацияләнгән техника колоннасы, шул исәптән Т-34 һәм ИС-3 танклары белән.

«Быел маршта Татарстан Республикасы Рәисе һәм Казан Мэриясе ярдәме белән махсус форма тегелгән яшь армиячеләр дә катнашачак, – дип билгеләп үтте Азат Абзалов. - Марш белән Казан югары уку йортларының хәрби кафедралары тәрбияләнүчеләре, танк училищесы укучылары һәм чыгарылыш укучылары, Казан гарнизонының хәрбиләштерелгән бүлекчәләре дә узачак. Бу 2,4 меңгә якын кеше».

8 нче майда шәһәр буйлап тарихи техника колоннасы узачак, ул Җиңү паркы, Дубравная урамындагы ветераннар йорты, Совет мәйданы һәм башка урыннарда тукталышлар ясаячак. «Мәскәү районында тукталыш Коләхмәтов урамында булачак һәм без ветераннарга сугыш еллары җырларын багышлыйбыз. Әлбәттә, «Җиңү көне» җырын җырлаячакбыз – бу бик матур, игелекле чара, анда волонтерлар да, иҗтимагый оешмалар да катнаша, һәм барысы да ветераннарга, аларның яшәү урыннарына зур игътибар белән карый».

9 нчы Майда, Җиңү Көнендә, чараларның бәйрәм программасына чәчәкләр салу, Казан гарнизоны гаскәрләренең йөреше, «Җырлый торган Казан» мең кешелек хоры чыгышы һәм башка бик күп нәрсәләр кертелде. Бәйрәм 22:00 сәгатьтә төсле салют белән тәмамланачак, аны Казансу акваториясеннән күзәтеп булачак.

Җиңүнең 78 еллыгын бәйрәм итүгә Татарстанның мәдәни учреждениеләре дә кушылачак, дип хәбәр итте ТР мәдәният министры урынбасары Дамир Натфуллин. Мәсәлән, Татарстан Республикасы Милли музеенда 21 нче майга кадәр татар композитор-фронтовикларының тормышына һәм иҗатына багышланган «Җиңү симфониясе» күргәзмәсе уза. Экспозициягә фронт хатлары, фотолар һәм нота кулъязмалары кертелгән.

«5 нче майда 12:00 сәгатьтә Татарстан Милли музеенда Җиңү көне алдыннан «Байрак – Җиңү символы» дигән тантаналы чара узачак. Бу көнне музей фондларыннан мактаулы каравыл озатуында Татар АССР территориясендә оештырылган һәм Берлинны штурмлауда катнашкан 146 нчы дивизиянең 280 нче артиллерия полкы байрагын алып чыгачаклар», - дип сөйләде Дамир Натфуллин.

Шул ук көнне Казан Кремлендә «Без хәтерлибез» флешмобы узачак, анда катнашучылар Кол Шәриф мәчете каршына тезелеп, хор белән «Җиңү көне» җырын башкарачак. Ә 9 нчы майда шул ук урында «Җиңүгә юл» квесты оештырыла. Моннан тыш, бу көннәрдә музей-тыюлык территориясендә автомобиль һәм башка техника, Бөек Ватан сугышы чоры кораллары күргәзмәләре эшләячәк.

Шулай ук укыгыз

Барлык яңалыклар