«Ул үзе килде»: Казан социалистик-көнкүреш музеенда Леонид Гайдайның 100 еллыгына күргәзмә ачыла

Килүчеләр иске телевизордан файдалана һәм кассетада режиссер фильмнарын карый алачак.

Фото: Социалистик-көнкүреш музее

(Казан шәһәре KZN.RU, 17 нче гыйнвар). Леонид Гайдайның 100 еллыгына Казанның Социалистик-көнкүреш музеенда «Ул үзе килде» күргәзмәсе ачылачак. Экспозициядә режиссер фотосурәтләре, фильмнардан фрагментлар, кинокартиналар буенча таныш предметлар һәм видеокассеталар тәкъдим ителәчәк.

Музей директоры Рөстәм Вәлиәхмәтов хәбәр иткәнчә, күргәзмәгә килүчеләр Леонид Гайдайның балачак һәм фронттагы яшьлек фотосурәтләрен, шулай ук фильмнар төшерелгән рәсемнәрне күрә алачак. Аларда режиссерны Юрий Никулин, Георгий Вицин, Евгений Моргунов, Наталья Варлей һәм башка актерлар арасында күрергә мөмкин. Шулай ук казанлыларның игътибарын фото форматындагы кинокартиналар фрагментлары җәлеп итәчәк.

Режиссерның яраткан фильмнары буенча тамашачыларга таныш булган предметлар Леонид Гайдайның иҗади мирасы атмосферасына чумарга ярдәм итәчәк.

Күргәзмәдә «Самогонщики» һәм «Пес Барбос и необычный кросс» фильмнары төшерелгән кинотасманың сакланып калган нөсхәләрен күрергә мөмкин. Музей коллекциясендә элеккеге мәгълүмат йөрткечләр – видеокассеталар да бар. Теләүчеләр алар арасында Леонид Гайдайның ошаган фильмнарын сайлап ала һәм аларны иске телевизор экранында карый алачак.

Экспозиция 19 нчы гыйнварда ачылачак, аны 5 нче февральгә кадәр карарга мөмкин. Социалистик-көнкүреш музее Университет ур., 6 адресы буенча урнашкан.

Шулай ук укыгыз

Барлык яңалыклар