Казанда сумо буенча Россия беренчелегендә 400 гә якын спортчы көч сынашачак

Ярышлар 28 нче марттан 1 нче апрельгә кадәр «Ак Барс» көрәш сараенда уза

Фото: Россиянең сумо федерациясе

Татарстан башкаласы өч яшь категориясендә егетләр һәм кызлар арасында сумо буенча Россия беренчелеген кабул итәчәк. Медальләр өчен илнең 25 тән артык төбәгеннән 400 гә якын спортчы көч сынашачак.

Ярышлар 28 нче марттан 1 нче апрельгә кадәр «Ак Барс» көрәш сараенда узачак, объект элегрәк күп кенә халыкара турнирларны, шул исәптән сумо буенча Европа чемпионатын һәм беренчелеген кабул иткән иде.

Ярышларны ачу тантанасы 29 нчы мартка планлаштырылган. Шул ук көнне медальләр өчен 15 яшькә кадәрге спортчылар көрәшәчәк. 30 нчы мартта мәйданга 17 яшькә кадәрге спортчылар чыга, ә 31 нче мартта җиңүчеләр һәм призерлар 19 яшькә кадәрге сумочылар арасында билгеләнәчәк.

Барлык яшь категорияләрендә дә алтын медальләр өчен көрәш финалистларның ике җиңүенә кадәр дәвам итәчәк. Ярышларның мондый форматын Орел шәһәрендә узган Россия чемпионатында уңышлы сынап караганнар. Яңа стандартның өстенлекләрен тамашачылар да, спортчылар да, сумо буенча җыелма команда тренерлары да югары бәяләде, дип хәбәр иттеләр ТР Спорт министрлыгында.

Шулай ук укыгыз

Барлык яңалыклар