Яңа ел бәйрәмнәрендә мәдәният учреждениеләрендә 400 тирәсе чара узачак

Татарстан Президенты катнашындагы республика чыршы бәйрәме 25-нче декабрь көнне «Баскет-холл»да узачак.

Фото: Казан шәһәре KZN.RU

(Казан шәһәре KZN.RU, 20-нче декабрь, Камилә Гобәйдуллина). Яңа елга 155 меңнән артык Казан баласы бүләк алачак. Аларны балалар бакчаларында тәрбияләнүчеләргә һәм башлангыч сыйныф укучыларына, шулай ук авыр тормыш хәлендә калган балаларга тапшырачаклар. Бу хакта бүген эшлекле дүшәмбедә Казан Башкарма комитетының Мәгариф идарәсе башлыгы Азат Абзалов хәбәр итте.

Гадәттәгечә, укучылар Татарстанның төп чыршысына бара алачак. «25-нче декабрьдә «Баскет-холл»да президент катнашында республика чыршы бәйрәме узачак. Аңа сәләтле балаларны, уку алдынгыларын, 7 яшьтән 17 яшькә кадәрге олимпиадаларда җиңүчеләрне чакыралар», – дип сөйләде мәдәният идарәсе җитәкчесе.

Моннан тыш, мәдәният учреждениеләре 400 тирәсе Яңа ел чарасы әзерләгән. Мастер-класслар, экскурсияләр һәм дәресләр каникул көннәрендә ТР Милли музее, «Казан Кремле» музей-тыюлыгы һәм аның филиаллары, ТР Дәүләт сынлы сәнгать музее, Казан зооботаника бакчасы һәм Кызыклы фән һәм техника йорты үткәрәчәк.

Театрларда, циркта, Татар дәүләт филармониясе һәм Сәйдәшев исемендәге концерт залында интерактив спектакльләр һәм мюзикллар тәкъдим ителәчәк Ә «Мәскәү», «Сәйдәш» һәм «Чулпан» мәдәни үзәкләрендә, Ленин мәдәният йортында, Тимер юлчылар һәм «Юность» мәдәният йортларында Кыш бабай һәм Кар кызы катнашында традицион тамашалар узачак.

«Яңа ел алды һәм кышкы каникуллар көннәренә әзерләнгән программа төрле. Ул балаларга да, аларның әти-әниләренә дә кызыклы булачак. Сезне якынлашып килүче Яңа ел белән чын күңелдән котлыйм», – дип мөрәҗәгать итте А.Абзалов халыкка.