«Игелек утлары»: Казанда авыруларны профилактикалауга һәм махсус ихтыяҗлары булган кешеләргә ярдәм итүгә багышланган проект эшли башлаячак

Программада: белгечләр чыгышлары, мастер-класслар, хәйрия ярминкәсе, концерт программасы

Фото: Марат Мөгыйнов

Шимбә көнне, 14 мартта, Бәшир Рәмиев исемендәге ИТ паркта «Игелек утлары» мәгълүмати-мәгърифәт проекты узачак. Чара сәламәтлек, авыруларны профилактикалау һәм яман шеш авырулары, инвалидлык һәм аерым тормыш шартлары булган кешеләргә ярдәм итү турында сөйләшүләргә багышланачак. Катнашуга шәһәр һәм республика халкы – яман шеш авырулары булган пациентлар һәм аларның якыннары, мазсус ихтыяҗлары булган балалы гаиләләр, медицина белгечләре һ. б. чакырыла.

Чара кысаларында казанлылар сигез тематик секциядә була ала: яман шеш авыруын профилактикалау, тернәкләндерү, туклану, психологик ярдәм, «көмеш яшь», үзенчәлекле балачак, яшь галимнәрнең уйлап табулары һәм коммерциячел булмаган оешмаларның иң яхшы практикалары. Белгечләр чыгышыннан тыш, программада шулай ук хәйрия ярминкәсе, мастер-класслар, коммерцияле булмаган секторны үстерү турында түгәрәк өстәл һәм концерт программасы да бар.

Вакыйга азагында яктылык акциясе узачак, анда һәркем табибларга рәхмәт йөзеннән һәм катлаулы дәвалану юлын узучыларга ярдәм йөзеннән фонарен кабызачак.

Катнашу өчен теркәлергә кирәк. Проектка шулай ук онлайн кушылырга мөмкин, дип хәбәр иттеләр «Игелекле Казан» коммерцияле булмаган автоном оешмасында.

Чарага килергә теләүчеләрне Спартак урамындагы 2а йорт адресы буенча көтәләр.

Шулай ук укыгыз

Барлык яңалыклар