Үзәкләштерелгән инженерлык челтәрләре булганда гына дачаны торак йорт итеп рәсмиләштерергә мөмкин

Кертелгән яңа үзгәрешләр нигезендә, төзелеш су басу яки су астан керә торган зона чикләрендә урнашкан җир кишәрлегендә булырга тиеш түгел.

Фото: Марат Мөгыйнов

(Казан шәһәре KZN.RU, 11 нче март). Март аенда РФ Хөкүмәтенең 2022 елның 17 нче февралендәге торак булмаган төзелешне торак бина итеп рәсмиләштерүгә кагылышлы 187 нче номерлы карары үз көченә керде.

Яңалыклар нигезендә, дачаны, су басу яки су астан керә торган зона чикләрендә урнашкан җир кишәрлегендә төзелгән булса, торак йорт буларак рәсмиләштерергә ярамый. Җылылык, электр, салкын һәм кайнар су белән тәэмин итү, канализация, газ (әгәр район газ белән тәэмин ителгән булса) булу мәҗбүри. Коммерциягә нигезләнмәгән бакчачылык ширкәтләрендә ике каттан да артык булмаган йортларда суүткәргеч һәм канализация булмау рөхсәт ителә.

Шул ук вакытта йорт бакча участокларында яки торак пунктлар җирләрендә булырга тиеш. Урман фонды җирләрендә яки су саклау зонасы чикләрендә торак төзү тыела. Бакчачылык өчен билгеләнгән җирләрдә хуҗалык каралтыларын гына төзергә мөмкин.

Гариза күп функцияле үзәкләргә (әгәр мондый хезмәт муниципалитетлар белән килешүдә каралган булса), яки турыдан-туры җирле үзидарә органнарына тапшырыла. Анда бинаның һәм җир участогының кадастр номеры һәм милекче турында белешмәләр күрсәтелә.

Гаризага төзелешнең төп характеристикалары һәм аңа милек хокукы турында күчемсез милекнең Бердәм дәүләт реестрыннан өземтә һәм бинаны тикшерү буенча бәяләмә беркетәләр. Әгәр дә милек күчемсез мөлкәт буларак берничә кешегә рәсмиләштерелгән икән, йортны яңа статуска күчерү турындагы карар белән барысы да риза булырга тиеш.

Әгәр гражданнар торак шартларын яхшыртуга чиратта торса, шәһәр читендәге торак йортның мәйданы бер кешегә булган квадрат метрны исәпләгәндә исәпкә алыначак, дип хәбәр ителә «Минем документлар» сайтында.

Шулай ук укыгыз

Барлык яңалыклар