Казанда яңа «Сан» IТ-кварталы 4 меңнән артык эш урыны булдырырга мөмкинлек бирәчәк

Татарстан Президенты Рөстәм Миңнеханов Республика көненә технопарк ачарга кушты.

Фото: Казан шәһәре KZN.RU

(Казан шәһәре KZN.RU, 26 нчы гыйнвар, Алинә Бережная). Быел Казанда элеккеге «Спартак» аяк киеме фабрикасы базасында «Сан» IТ-кварталын төзү планлаштырыла. Биредә IТ-компанияләр өчен 4 меңнән артык эш урыны булдырылачак. Татарстан Президенты Рөстәм Миңнеханов яңа технопаркны 30 нчы августка ачарга кушты.

«Глобаль проект, башкаладагы иң яхшы урында урнашачак. Республика көненә без яңа IТ-парк төзергә генә түгел, аны эшләтеп җибәрергә дә тиешбез», – диде Р.Миңнеханов Татарстан Республикасы Цифрлаштыру министрлыгының йомгаклау коллегиясендә.

Технопарк ике бинадан торачак, аның мәйданы 43 мең кв.м тәшкил итәчәк – бу Казан IТ-паркы бинасыннан бер ярым тапкырга диярлек күбрәк.

««Сан» кварталы Казан үзәгендә республика IТ-индустриясенең яңа визит карточкасы булачак һәм Татарстанның илдә IТ-технологияләр үсешендә лидер буларак позициясен ныгытачак», – дип саный Татарстан Республикасы Министрлар Кабинеты башлыгы Айрат Хәйруллин.

Халык тавыш бирүе нәтиҗәләре буенча яңа IТ-парк күренекле галим, үзебезнең илнең электрон исәпләү машинасын ясаучы Бәшир Рәмиев исеме белән аталачак.

Шулай ук укыгыз

Барлык яңалыклар