"Бердәм Россия" партиясенең Казан бүлеге Башкарма комитетының яңа җитәкчесе итеп Ольга Воронова билгеләнде

Бу хакта эшлекле дүшәмбедә Казан Мэры хәбәр итте.

(Казан шәһәре KZN.RU, 12-нче ноябрь, Алена Мирошниченко). Бүген Казан Мэры Илсур Метшин аппарат киңәшмәсе барышында "Бердәм Россия" партиясенең Казан бүлеге Башкарма комитетының яңа җитәкчесен тәкъдим итте. Әлеге вазыйфага элек Казан Башкарма комитеты аппаратының оештыру идарәсен җитәкләгән Ольга Воронова билгеләнде.

"Узган атнада "Бердәм Россия" конференциясе үтте. Ольга Михайловна – искиткеч профессионал, кешелекле. Без аның эшен югары бәялибез һәм хөрмәт итәбез", - диде Казан Мэры.

И.Метшин искәртеп үткәнчә, элеккеге җитәкче Наталья Гречанникованы ТР мәгариф һәм фән министры урынбасары вазыйфасына билгеләгәч, нәкъ менә Ольга Воронова әлеге урынга тәкъдим ителде. "Ышанам, Ольга Михайловна партия эшен тиешле дәрәҗәдә алып барыр, аны яңа дәрәҗәгә күтәрер. Бигрәк тә, киләсе елда узачак ТР Дәүсоветына сайлауларга әзерләнү кебек җаваплы вакытта", - диде Мэр.

О.Воронинаны билгеләү турындагы карар "Бердәм Россия" партиясенең Казан җирле бүлегенең XXIX конференциясендә партиянең үзәк комитеты тарафыннан игълан ителде.