2022 елда казанлыларның яңа ел каникуллары 1 гыйнвардан 8 гыйнварга кадәр дәвам итәчәк

Татарстан Республикасы Хезмәт министрлыгы җитештерү календарен эшләде.

Фото: Денис Гордийко

(Казан шәһәре KZN.RU, 27-нче октябрь). ТР Хезмәт, халыкны эш белән тәэмин итү һәм социаль яклау министрлыгы тарафыннан эшләнгән 2022 елга җитештерү календаре чыкты. Биш көнлек эш атнасында ике ял көне белән 244 эш көне булачак, ә ял көннәре – 119 көн, шул исәптән 18 эшләми торган бәйрәм көннәре.

Җитештерү календаре нигезендә, киләсе елда Татарстанда 1-6-нчы гыйнвар һәм 8 гыйнвар көннәре – яңа ел каникуллары, 7-нче гыйнварда Раштуа бәйрәме, 23-нче февраль – Ватанны саклаучылар көне, 8-нче март – Халыкара хатын-кызлар көне, 1-нче май – Яз һәм Хезмәт бәйрәме, 9-нчы май – Җиңү көне, 12-нче июнь – Россия көне, 30-нчы август – Татарстан Республикасы һәм Казан шәһәре көне, 4-нче ноябрь – Халыклар бердәмлеге көне, 6-нчы ноябрь - Татарстан Республикасы Конституциясе көне, шулай ук Ураза һәм Корбан бәйрәмнәре эшләми торган бәйрәм көннәре булып тора.

Ай календаре һәм барлыкка килгән традицияләр нигезендә Ураза гаете һәм Корбан бәйрәменең башлану көннәре ТР Президенты Указы белән билгеләнә. ТР мөселманнары Диния нәзарәте мәгълүматлары буенча, Ураза гаетен билгеләп үтүнең алдан куелган датасы – 2 май, Корбан бәйрәме – 9 июльгә туры киләчәк.

Ял һәм эшләми торган бәйрәм көннәре туры килгәндә, ял көне, гыйнвар бәйрәмнәреннән тыш, бәйрәм эш көненнән соң икенче көнгә күчерелә. Киләсе елда түбәндәге ял көннәре күчереләчәк: 1-нче гыйнвар шимбәсе 3-нче майның сишәмбесенә, 2-нче гыйнвар якшәмбесе 10-нчы майның сишәмбесенә, 5-нче март шимбәсе 7-нче мартның дүшәмбесенә.

Эшләми торган бәйрәм көненә туры килгән эш көне яки сменаның дәвамлылыгы бер сәгатькә киметелә, дип хәбәр итә ТР Хезмәт, халыкны эш белән тәэмин итү һәм социаль яклау министрлыгы матбугат хезмәте.

Шулай ук укыгыз

Барлык яңалыклар