Төнлә Казанда бозлавык барлыкка килү ихтималы булганга, 47 махсус машина кизү торачак

Бозлавык барлыкка килгән урыннарда алар юлларны боздан арындыру эшенә керешәчәк

Денис Гордийко фотосы

Бүген төнлә Казанда бозлавык барлыкка килү ихтималы булганга, дүрт төзекләндерү предприятиесе: «Горводзеленхоз», «Шәһәрне төзекләндерү», «Шәһәр күперләре», «Киров районының Юл төзекләндерү-эксплуатация идарәсе» муниципаль унитар предприятиеләре юлларны боздан арындыру эшенә әзерләнгән. Гомумән алганда, 47 катнаш юл машинасы кизү торачак.

Муниципаль унитар предприятиеләр юллардагы вәзгыятьне даими тикшереп тора. Бозлавык хасил булуның беренче билгеләре барлыкка килүгә, техника урамнарга чыгачак һәм юлларны бозлавыкка каршы материал белән эшкәртәчәк, дип хәбәр итә Казан шәһәренең Тышкы төзекләндерү комитеты.

Узган төндә предприятиеләр вәзгыятьне контрольдә тоту өчен шулай ук кизү торган. 14 берәмлек техника аеруча игътибар таләп ителә торган участокларга: күперләргә, юлүткәргечләргә, юл чишелешләренә алдан бозлавыкка каршы материаллар сипкән.

Исегезгә төшерәбез, синоптиклар фаразлавынча, төнлә юеш кар, бозлы яңгыр явуы көтелә. Шуңа бәйле рәвештә төнлә шәһәрнең аерым районнарында бозлавык барлыкка килергә мөмкин. Һава температурасы -4…-6 градус, иртәнге сәгатьләрдә -1…+1 градус булачак.

Шулай ук укыгыз

Барлык яңалыклар