Төнлә шәһәр урамнарыннан 3,2 мең тонна кар чыгарганнар

Бүген көндез юлларны җыештыруда 571 эшче һәм 329 берәмлек техника эшли

Узган төндә Казан урамнарыннан 3,2 мең тонна кар чыгарганнар. Бозга каршы эшкәртү өчен 167,9 тонна реагент һәм 451,7 тонна ком-тоз катнашмасы кулланганнар. Төнге юлларны җыештыруга 89 эшче һәм 366 берәмлек техника җәлеп ителгән.

Тышкы төзекләндерү комитетында хәбәр итүләренчә, хәзер юлларны һәм тротуарларны кардан чистарталар, шуннан соң аларны бозлавыкка каршы материаллар белән эшкәртәчәкләр. Бүген көндез урамнарны чистартуга 329 берәмлек махсус техника һәм 571 юл эшчесе чыгачак.

Кышкы сезон башыннан шәһәр урамнарыннан 132,5 мең тоннадан артык кар чыгарылган, 24,1 мең тонна бозлавыкка каршы материал тотылган.

Ишегалларын җыештыруга кагылышлы кисәтүләрне шәһәр халкы «Открытая Казань» («Ачык Казан») сайтында яки +7(843)236-41-23 телефоны буенча да калдыра ала. Шулай ук проблемалы участоклар турында чат-ботка яки кайнар линия телефоннары аша хәбәр итәргә мөмкин.

Исегезгә төшерәбез, җылыну сәбәпле идарәче компанияләр һәм торак милекчеләре ширкәтләре йорт яны территорияләрендә карны чистарту эшен көчәйттеләр.

Яңа ел каникуллары дәвамында – 29 декабрьдән 8 гыйнварга кадәр – Казан ишегалларында 1450 идарәче компания эшләде, 70 берәмлек махсус техника эшләде, 160 тоннага якын бозлавыкка каршы материал кулланылды.

Шулай ук укыгыз

Барлык яңалыклар