Татарстанда төнлә һәм көндез буран һәм көчле, кинәт исә торган җил көтелә

Татарстанда төнлә һәм көндез буран һәм көчле, кинәт исә торган җил көтелә

<p> Бүген төнлә һәм иртәгә иртән Татарстанда урыны белән буран, күз күреме 1-2 чакрымга кадәр начараю һәм көчле, кинәт исә торган төньяк-көнбатыш җиле (тизлеге секундына 16-21 метрга кадәр булган) көтелә. </p> <p> Казанда төнлә аязучан болытлы һава булачак, урыны белән бераз кар явачак. Җил секундына 18 метрга кадәр. Иртән синоптиклар явым-төшемсез һава торышы вәгъдә итә, җил басыла (секундына 6-11 метрга кадәр). Төнлә минималь температура -18 дән -20 градуска кадәр, аязганда -23 градуска кадәр булачак. Көндез 16-18 градус салкын булыр дип көтелә. Юлларда бозлавык барлыкка килә, дип кисәтә ТР Гидрометеорология үзәге. </p> <p> Чәршәмбе төнлә республикада салкын һава сакланачак. Синоптиклар бераз кар, буран һәм җилнең тизлеге секундына 18 метрга кадәр булыр, дип фаразлый. Температура -14..-19 градус, аязганда -23 градуска кадәр төшәчәк. Көндез явым-төшем туктаячак, җил кимиячәк. Термометр баганалары -12..-17 градус салкын күрсәтәчәк. </p> <p> Пәнҗешәмбе, 23 гыйнварда, төбәктә явым-төшемсез һава торышы көтелә. Төнлә һәм иртән -18..-23 градуска кадәр, көнчыгышта аязганда -28 градуска кадәр суытачак. Көндез һава температурасы -10 градустан -15 градуска кадәр булыр, дип көтелә. </p> <p> ТРның Гидрометүзәге фаразлавы буенча, җомга һәм шимбә көннәрендә атмосфера фронтлары якын булу сәбәпле урыны белән бераз кар явачак. Температура төнлә -12..-17 градус, көндез -7..-12 градус булачак. </p>

2025-01-21T16:15:00+0300