ТР Милли китапханәсе кече гаилә фестиваленә чакыра

Программада: биюләр, мастер-класслар, психолог белән очрашулар, крафт уеннары, ярышлар һәм башкалар

13 сентябрьдә ТР Милли китапханәсендә кече фестиваль узачак. Кунакларны крафт уеннары (кулдан эшләнгән уеннар), психологлар консультацияләре, мавыктыргыч мастер-класслар һәм дискотека көтә, дип хәбәр итә Беренчеләр хәрәкәте матбугат хезмәте.

Фестиваль программасы 15:00 сәгатьтә башлана. 15:00 тән 17:00 гә кадәр китапханә террасасында махсус балалар зонасы эшләячәк. Кечкенә кунакларны мавыктыргыч крафт уеннары, күңелле ярышлар һәм хәтта шарлы бассейн да көтә – фестивальнең иң яшь катнашучылары өчен чын оҗмах.

Шул ук вакытта ата-аналар өчен психологлар белән мөһим очрашулар узачак. 15:00 тән 16:00 га кадәр белгечләр бала белән катлаулы темаларга ничек сөйләшергә һәм кризис ситуацияләрен хәл итәргә ярдәм итәчәкләр. 16:00 дан 17:00 гә кадәр очрашу балаларны яңа төркемнәрдә (мәктәп яки балалар бакчасында) яраклаштыруга, шулай ук төрле холыклы балаларны укыту үзенчәлекләренә багышланачак.

Шуннан соң, 17:00 дән 19:00 га кадәр, иҗади зона ачылачак. Биредә һәркем букчаларга һәм киемнәргә кулдан татар стилендә рәсем ясау буенча мастер-классларда катнашып, үзенең аерымлыгын күрсәтә алачак. Профессиональ рәссам барлык теләүчеләргә берничә минут эчендә портретлар ясаячак, ә матурлык зонасында кичке программага әзерләнү өчен бизәнергә мөмкин булачак.

Көннең кульминациясе «БиЮ» дискотекасы булачак, ул 17:00 дә башланачак һәм 20:00 гә кадәр дәвам итәчәк. Музыкаль җыелмаларны Scratch Dj School мәктәбен тәмамлаучылар тәкъдим итәчәк:17:00 дән 18:00 гә кадәр пульт артында Meraki булачак, аннары 18:00 дән 19:00 га кадәр эстафетаны Profsoyuz эләктереп алачак, ә кичне 19:00 дан 20:00 гә кадәр yankovskiyk тәмамлаячак.

Барлык активлыклар да бушлай. Катнашу өчен сылтама буенча теркәлү кирәк.

Шулай ук укыгыз

Барлык яңалыклар