Чит илдән килгән РФ гражданнары өчен яңа таләпләр эшли башлады

3 календарь көн эчендә ПЦР методы белән СОVID-19га бер тапкыр лаборатор тикшеренү узарга кирәк.

Фото: Марат Мугинов

(Казан шәһәре KZN.RU, 7-нче июль). Бүгенге көннән башлап чит илдән кайткан Россия гражданнары өчен яңа таләпләр гамәлгә ашырыла башлады. Үзгәрешләр РФ баш санитария табибының «COVID-19 таралуын булдырмау максатларында изоляция режимын тәэмин итү турында» карарына кертелгән.

Документ нигезендә, безнең ил территориясенә теләсә нинди транспорт төре белән кергән Россия гражданнары түбәндәгеләрне үтәргә тиеш:

Россия Федерациясенә очканчы, билет сатып алганда, әмма рейска теркәлгәннән дә соңга калмыйча дәүләт һәм муниципаль хезмәтләр күрсәтүнең бердәм порталында электрон рәвештә «Россия Федерациясенә килүчеләрне теркәү» анкетасын тутырырга;

РФ территориясенә килгән көннән алып 3 календарь көн эчендә ПЦР методы белән COVID-19-га бер тапкыр лаборатория тикшеренүе узарга.

ПЦР методы белән ясалган COVID-19 тикшеренүләре нәтиҗәләрен алганга кадәр яшәү урыны буенча изоляция режимын үтәргә кирәк, дип хәбәр итә Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең ТР идарәсе матбугат хезмәте.

Соңгы 12 ай эчендә COVID-19-дан вакцинация узган яки соңгы 6 ай эчендә кичерелгән авыру турында белешмәләр булган очракта, чит илләрдән кайтканда ПЦР методы белән лаборатория тикшеренүләрен үткәрү таләп ителми.

ПЦР методы белән үткәрелгән COVID-19 лаборатория тикшеренүе, кичерелгән авыру яки вакцинация турында белешмәләр мәҗбүри рәвештә РФ Дәүләт хезмәтләре порталында урнаштырыла. «Россия Федерациясе территориясенә килүчеләр өчен тест нәтиҗәләре, кичерелгән авыру яки яңа коронавирус инфекциясеннән вакцинация нәтиҗәләре турында мәгълүмат бирү» формасын тутырырга кирәк.

РФ территориясенә килгәннән соң, 14 календарь көн эчендә сәламәтлек торышы начарайган очракта, медицина оешмаларына бармыйча, яшәү урыны буенча кичекмәстән медицина ярдәме сорап мөрәҗәгать итәргә кирәк.

Шулай ук укыгыз

Барлык яңалыклар