Волжский су алу җайланмасында эретеп ябыштыру эшләре һәм бик арматурасын монтажлау башланды

Ремонт график буенча бара, су белән тәэмин итүне 29-нчы сентябрьгә кадәр торгызу планлаштырыла.

(Казан шәһәре KZN.RU, 28-нче сентябрь, Ксения Швецова). Казанда хәзерге вакытта бик арматурасын планнан тыш төзекләндерү эшләре бара торган Волжский су алу җайланмасында фланц тоташтыруларын урнаштыру буенча эретеп ябыштыру эшләре һәм бик арматурасында яңа суүткәргеч участогын монтажлау башланды. Ремонт график буенча бара, су белән тәэмин итүне 29-нчы сентябрьгә кадәр торгызу планлаштырыла.

Эшләр 22.00 сәгатьтә старт алды, алты сәгать эчендә торбаларны судан арындырып тору эше башкарылды, дип сөйләде «Водоканал» муниципаль унитар предприятиесе матбугат хезмәте җитәкчесе Эльвира Левада. Төзекләндерү эшләренә 5.00 сәгатьтә керешә алдылар. «Бүгенге көннең 12 сәгатенә авария хәлендәге эшермәне сүттек, барлык әзерлек эшләрен башкардык, яңа суүткәргеч участогы урнаштырдык, хәзер фланц тоташтыруларын урнаштыру буенча эретеп ябыштыру эшләре алып барыла, – дип сөйләде Э.Левада. - Барлык эшләр дә график буенча, өзеклекләрсез бара».

30 сәгать тирәсе булган төзекләндерү эше вакытында Авиатөзелеш, Киров, Мәскәү һәм Яңа Савин районнарындагы йортларның бер өлешендә су белән тәэмин итү туктатылды. Әмма су туктатылырга тиешле кайбер йортларда су белән тәэмин итү бетмәде. Э.Левада аңлатканча, бу янгын куркынычсызлыгын тәэмин итү өчен нигездә ябык режимда эшли торган эшермәләрне ачу белән бәйле. «Бу күбесенчә җирлек рельефына бәйле: йорт түбән территориядә торса, су бар димәк. Нигездә, түбән катларда яшәүчеләргә суүткәргечтә басым җитәрлек», - дип аңлатты ул.

Көн ахырына кадәр эретеп ябыштыру һәм суүткәргеч участогын монтажлау эшләрен төгәлләргә кирәк булачак. «Хәзер иң мөһиме - җөйләрне эретеп ябыштыру. Барлык җөйләрне дә герметик рәвештә ябыштырырга кирәк, бу бик катлаулы процесс, бигрәк тә металл калын һәм шундый диаметрда булганда», - диде Э.Левада. Авария хәлендәге эшермәнең диаметры 1000 мм тәшкил итә.

«Водоканал» бер үк вакытта башка участокларда да эшләр алып бара: 12 бик арматурасын төзекләндерү, 30-дан артык янгын гидрантын алыштыру, насос җиһазларын автоматикалау системасын алыштыру һәм ремонтлау эшләре бара. Бу эшләр дә график буенча бара һәм су белән тәэмин итүне туктатып тору вакытына берничек тә йогынты ясамаячак, дип ассызыклый белгечләр.

«Элек хәбәр ителгәнчә, якшәмбе иртәсенә су белән тәэмин итү технологик режимга керәчәк», – диде Э.Левада.

Сусыз калган барлык районнарга 6.00 сәгатьтән башлап техник һәм эчәргә яраклы су китерү оештырылган, шулай ук барлык медицина учреждениеләре һәм башка социаль өлкә объектлары су белән тәэмин ителгән.

Исегезгә төшерәбез, 1969 елгы эшермәнең чуен корпусындагы ярыкны планлы тикшерү барышында ачыкладылар. Төзекләндерү эшләрен башкару өчен 1788 күп фатирлы торак йортта, 10 мең шәхси йортта һәм 800 социаль өлкә объектында су бирү туктатылды. Тагын 300 күп фатирлы торак йортта һәм социаль сфераның 70 объектында су басымы кимеде. Шәһәрлеләр өчен суны алып килү эше оештырылачак.