Зур Казан боҗрасы участогында төзүчеләр эшләрнең йомгаклау этабына кереште

Беренче этапны төзүдә узган атнада 27 махсус техника һәм 81 белгеч катнашкан.

(Казан шәһәре KZN.RU, 29-нчы июнь). ТР башкаласында Зур Казан боҗрасын төзүнең беренче этабы дәвам итә. Юлүткәргеч астыннан һәм Ферма шоссесыннан Борисково урамына кадәр сул як төшү юлы буенча вакытлыча схема буенча хәрәкәт оештырылган. Бу төзүчеләргә төзелеш объектында эшләрнең йомгаклау этабына керешергә мөмкинлек биргән.

Узган атнада юлүткәргечнең уемлы төзелешендә вак таштан балласт "тагарагы" корылган һәм трамвай юлларының рельс шпаль рәшәткәсе салынган. Су үткәргеч улаклар урнаштыру эшләре башланган.

Җир өсте җәяүлеләр кичүенең 1, 2, 3 һәм 4-нче баскычтан төшү урыннарында монолит поликарбонат конструкцияләрен пыялалау белән каркасларның металл конструкцияләрен монтажлау дәвам итә, шулай ук җәяүлеләр кичүен ясалма яктыртуның тышкы һәм эчке системаларын монтажлау эше алып барыла. Уемлы төзелеш монтажы башкарылган.

Юл катламына 513 куб метр күләмдә вак таштан түшәмә катлам салынган. 301 квадрат метр мәйданда түбән катлам һәм 1309 квадрат метр мәйданда өслекнең өске катламы салынган. 665 квадрат метр мәйданда тротуарларга асфальт җәелгән, дип хәбәр итә ТР Транспорт һәм юл хуҗалыгы министрлыгы матбугат хезмәте.

Тула урамындагы 3-нче номерлы юлүткәргечнең терәк дивары буйлап "юл киемнәре" сүтелә башлады.

Беренче этапны төзүдә узган атнада 27 махсус техника һәм 81 белгеч катнашкан.

Исегезгә төшерәбез, Зур Казан боҗрасының беренче этабы 2019 елның июлендә «Имин һәм сыйфатлы автомобиль юллары» илкүләм проекты буенча төзелә башлады. Мидхәт Булатов урамыннан Борисково урамына кадәр Ферма шоссесы өстеннән һәм җир астыннан юлүткәргеч белән 800 м озынлыктагы дүрт полосалы юл төзелә.

Борисково урамыннан Техника урамына кадәр участоктагы төзелешнең икенче этабы мартта башланды. Участокның озынлыгы 1,22 чакрым тәшкил итә. Дүрт полосалы юл һәр юнәлештә ике полоса белән беренче класслы гомумшәһәр әһәмиятендәге магистраль урам категориясе буенча проектланган. 700 м озынлыктагы участокны 2020 елда, ә 522 м озынлыктагы участокны 2021 елда кулланылышка кертү планлаштырыла.

Шулай ук укыгыз

Барлык яңалыклар