«Казаныш» өченче архитектура-төзелеш форумында 20 илдән спикерлар чыгыш ясаячак

Татарстан башкаласының үзенчәлеген чагылдыру чараның төп темасы булачак

Фото: Денис Гордийко

(Казан шәһәре KZN.RU, 13 ноябрь, Диләрә Гафурова). Г.Камал театрында 5-7 нче декабрьдә «Казаныш» халыкара архитектура-төзелеш форумы ачылачак. Чарага җиде мең кеше килер дип көтелә, ә 20 илдән, шул исәптән Кытай, Һиндстан, Аргентина, Берләшкән Гарәп Әмирлекләре, Мисыр, Согуд Гарәбстаны экспертлары спикер булачак, бу 2024 елда Казанда БРИКС илләре саммиты уздыру белән бәйле. Бу хакта аппарат киңәшмәсендә Казанның баш архитекторы Илсөяр Төхвәтуллина хәбәр итте.

«Архитектура һәм шәһәр төзелеше идарәсе, баш архитектор хезмәте, Башкарма комитет аппараты фикер алышу темалары кызыклы гына түгел, ә шәһәребез үсеше өчен дә гамәли әһәмияткә ия булсын өчен программаны җентекләп әзерли», – диде Казан Мэры Илсур Метшин.

Быел «Казаныш» шәһәр үзенчәлеге эгидасы астында узачак. Бу БРИКС илләренең булачак саммитында «Гадел глобаль үсеш һәм иминлек өчен күпкырлылыкны ныгыту» темасы игълан ителү белән бәйле. Шуңа күрә Илсур Метшин ярдәме белән Казанның үзенчәлеген чагылдыру темасына форум үткәрергә карар кылынды. Халыкара экспертлар белән илләрнең үзенчәлеген ничек теркәүләре һәм үзгәлекне яңа шәһәр төзелеше һәм архитектура карарларына кертүләре турында фикер алышу планлаштырыла.

«Символик рәвештә чараның мәйданчыгы да сайланган – Г.Камал театры бер үк вакытта Татарстан мәдәниятен гәүдәләндерә һәм төрле илләрнең заманча иҗади хезмәттәшлеге үрнәге булып тора. Хәзерге вакытта театрның тарихи бинасы янында яңа бина төзелә, аның проекты халыкара конкурста җиңде», – дип аңлатты Илсөяр Төхвәтуллина.

Илсөяр Төхвәтуллина хәбәр иткәнчә, форумда шәһәрнең үзенчәлегеннән тыш, «Европа – Көнбатыш Кытай» халыкара транспорт коридоры проектының бер өлеше булачак М-12 федераль трассасын ачу турында да фикер алышачаклар, көнчыгыш белән көнбатыш арасындагы күпер буларак Казанның ролен тагын бер кат ассызыклап үтәчәкләр. Дискуссиядә катнашу өчен трассага якын шәһәрләрнең баш архитекторлары һәм мэрлары чакырылган. Моннан тыш, транспорт-күчеш төеннәренең территорияләр үсешенә йогынтысы турында фикер алышу планлаштырыла.

Тыңлаучылар алдында алдынгы архитектура бюроларының 100 дән артык эксперты чыгыш ясаячак. Сылтама буенча тулы программа белән танышырга һәм форумга теркәлергә мөмкин.

Илсөяр Төхвәтуллина искәрткәнчә, Г.Камал театрындагы форум кысаларында «Отражение идентичности» күргәзмәсе эшләячәк. Анда катнашу өчен 16 нчы ноябрьгә кадәр гариза бирергә мөмкин. Экспозиция өчен җыелган материаллар шәһәр үзгәлеге каталогын формалаштырганда кулланылачак дип планлаштырыла.