Казан хосписының төзелеп килүче икенче корпусы территориясендә котельня монтажы тәмамланды

Яңа бүлек 200 кеше кабул итә ала.

Фото: Анжела Вавилова исемендәге хәйрия фонды

(Казан шәһәре KZN.RU, 19-нчы гыйнвар). Анжела Вавилова исемендәге Казан хәйрия фонды хосписының төзелә торган икенче корпусы территориясендә котельня монтажы тәмамланды, бу хакта фонд идарәсе рәисе Владимир Вавилов хәбәр итте.

Аның сүзләренә караганда, котельняны әзерләү 11 миллион сумга төшкән. Котельняны Саратовта, медицина учреждениеләре өчен барлык таләпләрне үтәп, махсус проект буенча әзерләгәннәр.

«Барлык эшләр тәмамланганнан соң, котельня автоном рәвештә эшли башлаячак – димәк, хосписта һәрвакыт җылы булачак, – дип билгеләде Владимир Вавилов. – Без заказны бәяләр күтәрелгәнче түләргә өлгердек. Хәзер мондый проект 20 миллионнан артык торыр иде. Бәяләрнең даими үсеше – безнең барысын да тиз арада эшләргә тырышуыбызның сәбәпләренең берсе».

Икенче хосписның төзелеше тулы көченә бара, хәзер төп челтәрләр салына башлый. Җылылык һәм суны бүлү өчен җавап бирәчәк җылылык төенен тулысынча җиһазландырырга кирәк. Барлык эшләр якынча 7 миллион сумга төшәчәк.

Хоспис нигездә хәйрия иганәләренә төзелә. Казанлылар «Хосписны бергә төзик» марафонына кушыла һәм теләгән сумманы хоспис картасына яки счетына күчерә ала – барлык кирәкле реквизитлар Анжела Вавилова исемендәге фонд сайтында бастырылган.

Төзелеш эшләре тәмамланганнан соң, икенче стационарда ким дигәндә 60 урынлы өлкәннәр бүлеге ачылачак, кирәк булганда аны 200 урынга кадәр җәелдерергә мөмкин булачак. Үз чиратында, гамәлдәге хосписта балалар бүлеген киңәйтү һәм тулысынча ачу планлаштырыла.

Шулай ук укыгыз

Барлык яңалыклар