Яңалыклар
08.02.2021, 14:00
Казанда «Иске шәһәр» территориясендә Татар кулъязмасы үзәге пәйда булачак
Тарихи-агарту комплексында иске кулъязма китапларны саклау урыны, реставрация остаханәләре, лекторийлар һәм җәмәгать китапханәсе булачак.
Фото: Денис Гордийко
(Казан шәһәре KZN.RU, 8-нче февраль, Алена Мирошниченко). «Иске шәһәр» территориясендә Казанда Татар кулъязмасы үзәге ачу планлаштырыла. Тарихи-агарту комплексында Иске кулъязма китапларны саклау урыны, реставрация остаханәләре, лекторийлар һәм җәмәгать китапханәсе урнашачак. Бу идея Татарстан Президенты Рөстәм Миңнеханов һәм Казан Мэры Илсур Метшин тарафыннан хуплау тапты. Хәзерге вакытта үзәк урнаша алачак җиде объект тикшерелә. Бу хакта хисап барышында башкарма комитет җитәкчесе Рөстәм Гафаровка «Иске шәһәр» территориясе префекты Роберт Гарипов сөйләде.
2025 елга кадәр Иске Татар бистәсен үстерүнең «юл картасын» әзерлиләр
Префектура чикләрендә күпсанлы мәдәни мирас объектлары: 11 мәчет һәм 4 православие объекты, 97 бина һәм корылма урнашкан, шуларның 7-се федераль әһәмияткә ия. Һәр объектның үз тарихы, үз милекчесе һәм үз хәле, дип билгеләде спикер.
«Бу мәсьәләдә тулы картинага ия булу өчен без Казанның тарихи өлешендәге мәдәни һәм шәһәр формалаштыручы объектлар реестрын цифрлаштыру һәм яңартуга керештек. Территориягә тирән анализ ясала, аның глобаль инвентаризациясе уздырыла. Нәтиҗәдә, без һәр объект буенча җентекле мәгълүмат һәм аңлау алачакбыз», – дип аңлатты Р.Гарипов.
Аның тарихи һәм мәдәни кыйммәтләрен саклау шартларында территорияне реновацияләү мөһим бурыч булып тора. Шулай итеп, ТР Президенты ярдәмчесе Наталия Фишман-Бекмамбетова һәм Мәскәү архитектура бюросы Наринэ Тютчева белән берлектә мастер-план эшләнде. Рөстәм Миңнеханов башкарылган эшне югары бәяләде һәм аны һичшиксез ахырына җиткерергә кирәк, дип ассызыклады.
Хәзер бу өстенлекле бурычларның берсе. 2025 елга кадәр проектның «юл картасы» эшләнәчәк, ул шәһәрлеләр өчен уңайлы киңлек булдырырга һәм туристлар агымын шактый арттырырга мөмкинлек бирәчәк, дип билгеләп үтте префект.
Яшь активистлар «Мазут» йортын консервациягә әзерлиләр
Моның белән беррәттән Яңа Татар бистәсен торгызу эшләре дә бара. Идеяләрнең берсе монда 25 югалган тарихи объектны торгызу һәм туристлык маршрутларын эшләү.
«Иске шәһәр» махсус территориясенең үсеш перспективаларын без Казанның тарихи җирлегенең тотрыклы үсеше концепциясендә күрәбез. Анда иске татар һәм Яңа Татар бистәләренә аерым урын бирелгән. Безнең өчен проектның чиктәге өлешләрне күтәрүгә, сәнәгать һәм бистә территорияләрен яңартуга юнәлдерелгән булуы мөһим», – дип ассызыклады Р.Гарипов.
«Иске шәһәр» территориясе префекты сүзләренә караганда, тарихи объектларны торгызуда иске заман кешеләре, танылган сәүдәгәр фамилияләре һәм бөек татар акыл ияләренең дәвамчылары актив катнаша. Алар катнашында сәүдәгәр Муллин утары – Каюм Насыйри урамындагы яңа туристик комплекс салына. Ул кунакларны XIX гасыр татарлары тормышы белән таныштыра.
«Архитектурасы» телеграм-каналы авторы Ян Гордеев җитәкчелегендәге яшь активистлар Мехчылар урамы, 2-нче номерлы йортта урнашкан «Мазут» йортын консервациягә әзерлиләр. «Без бу идеяне хупладык, йортка «Мәдәни мирас объекты» статусы бирүне тәкъдим иттек, чүп контейнерларын урнаштыруда ярдәм иттек. Сүз уңаеннан, уртак эш вакытында 20 кубтан артык чүп-чар чыгарылды», – дип сөйләде префект.
Декабрьгә кадәр Мәрҗани ислам көллиятен реконструкцияләүне төгәлләү планлаштырыла
Моннан тыш, 2020 елда Иске Татар бистәсендә ике әһәмиятле объектны реконструкцияләү башланды. Мәсәлән, Каюм Насыйри урамы, 10-нчы йортта урнашкан Шиһабетдин Мәрҗани йортын төзекләндерү эшләре бара. Бина 1858 елда төзелгән һәм республика әһәмиятендәге мәдәни мирас объекты булып тора. Хәзерге вакытта биредә фундаментны ныгыттылар һәм аны гидроизоляцияләделәр. Йортның хатын-кызлар ягында эшләр вакытында подвал бинасы табылган, аның турында элек билгеле булмаган. Шуңа бәйле рәвештә эшләр вакытлыча туктатылган, дип аңлатты спикер.
Агымдагы елның гыйнварында Шиһабетдин Мәрҗани ислам көллиятен реконструкцияләү башланды. Биредә фасад, түбә һәм гомумтөзелеш эшләре, территорияне төзекләндерү, шулай ук эчке һәм тышкы инженерлык коммуникацияләрен алыштыру планлаштырыла. Төзекләндерүне декабрьдә төгәлләү планлаштырыла.
Фоторепортаж
«Иске шәһәр» территориясе префекты Роберт Гариповның Башкарма комитет җитәкчесе Рөстәм Гафаров алдында хисабы
Шулай ук укыгыз
-
29.04.2025, 17:56 -
29.04.2025, 17:11 -
29.04.2025, 16:02 -
29.04.2025, 10:11
