«Зооцентр» Казан приюты территориясендә этләрне йөртү өчен манеж мәйданчыгы ачылачак

Якын арада 600 хайванга исәпләнгән карантин блогы файдалануга тапшырылачак.

Фото: Денис Гордийко

(Казан шәһәре KZN.RU, 25-нче август, Ксения Швецова). «Зооцентр» Казан приюты территориясендә сентябрьдә манеж мәйданчыгы ачылачак, анда шәһәр халкы дүрт аяклы йорт хайваннары белән йөри алачак. Моннан тыш, 600 хайванга исәпләнгән карантин блогы төзелеше тәмамланып килә. Бу хакта приют директоры Рөстәм Нуруллин «Сәйдәш» мәдәни үзәгендә узган йорт хайваннары мәсьәләсе буенча түгәрәк өстәлдә хәбәр итте.

Приют территориясендә манеж мәйданчыгы төзелеше аны модернизацияләүнең бер этабына әверелде. «Без волонтерлар һәм балалар белән килүчеләрнең йөрү, бу мәйданчыкта хайваннар белән уйнау, алар белән якыннанрак танышуларына ирешергә телибез, – диде ул. – Бу безгә гаиләләргә урнаштырылучы этләрнең санын арттырырга мөмкинлек бирәчәк».

Приют территориясендә объектлар реконструкцияләү һәм төзү «Хайваннар белән җаваплы эш итү турында» яңа федераль закон үз көченә кергәннән соң старт алды, дип искәртте Р.Нуруллин. Канун йортсыз этләрне тота торган приютларга карата таләпләр билгели. Хайваннар өчен бинада һава температурасы +7 градустан да түбәнрәк булырга тиеш түгел, биналар һәм территорияләр мәйданнарының яшәү һәм этләр йөртү өчен минималь күләмнәре билгеләнгән.

«Без алдыбызга бер бурыч куйдык: барлык таләпләргә җавап бирерлек заманча приют булдыру, һәм узган ел төзелеш эшләрен башладык, – диде Р.Нуруллин. – Без барлык нормаларга туры килә торган 900 хайванга исәпләнгән җылы блок төзедек». Яңа корпуста һәр эткә 1,2 кв.м мәйданлы эт оясы каралган, 20 кв.м мәйданлы көтү зонасы төзелгән, ул 10 эткә исәпләнгән.

2022 ел ахырына кадәр приют территориясендә шулай ук 1 мең хайванга исәпләнгән стационар төзү планлаштырыла, бу бер үк вакытта 2 меңнән артык этне тотарга мөмкинлек бирәчәк.

Исегезгә төшерәбез, яңа федераль закон гамәлдә булган 1,5 ел эчендә 6 меңнән артык эт тотылган, 4,5 меңнән артык хайванга операция ясалган һәм иреккә чыгарылган.