Атна эчендә Казанның ашыгыч ярдәм хезмәте бала табу очракларына 67 тапкыр чакыртылган

7174 тапкыр медиклар төрле авырулар белән бәйле чакырулар кабул иткән.

(Казан шәһәре KZN.RU, 11-нче февраль). 4-нче февральдән 10-нчы февральгә кадәрге атнада Казанның ашыгыч ярдәм хезмәтенә 8725 чакыру килгән, аларның 1139 очрагы җәмәгать урыннарына бару белән бәйле.

Төрле авырулар сәбәпле ашыгыч ярдәмгә 7174 казанлы мөрәҗәгать иткән. Аерым алганда, көчле миокард инфаркты буенча 56 очрак һәм мидәге кан әйләнеше бозылу буенча 174 очрак теркәлгән. Бала табу очраклары уңаеннан табибларга 67 чакыру килгән.

789 чакыру бәхетсезлек очраклары белән бәйле. Юл-транспорт вакыйгалары белән бәйле очракларга 34 тапкыр чакыртылганнар, аларда 32 кеше зыян күргән, 16 кеше хастаханәгә озатылган. Янгын очракларына табиблар 16 тапкыр чакыртылган, биредә 6 кеше зыян күргән, 1 кеше үлгән.

Узган атна белән чагыштырганда, чакырулар саны 549-га арткан. Бала табу очраклары белән бәйле чакырулар 9-га арткан. Янгыннарга (3-кә), миокард инфарктына (2-гә), мидәге кан әйләнеше бозылу (15-кә) очракларына бәйле чакырулар саны арткан. Юл-транспорт һәлакәтләре белән бәйле чакырулар саны үзгәрмәгән. Җәмәгать урыннарына чакырулар саны 172-гә арткан, дип хәбәр итә “Казанның ашыгыч медицина ярдәме станциясе” дәүләт автоном сәламәтлек саклау учреждениесе.

Шулай ук укыгыз

Барлык яңалыклар