KZN.RU порталында, хезмәт батырлыгы шәһәре буларак, Казанга багышланган бүлек ачылды

Казанлылар шәһәргә мактаулы исем бирү инициативасын хуплый ала.

(Казан шәһәре KZN.RU, 3-нче март). KZN.RU порталында za.kzn.ru бүлеге ачылды, ул, хезмәт батырлыгы шәһәре буларак, Казанга багышланган.

Бүлектә илнең иң мөһим тыл үзәкләренең берсе булган шәһәребез халкының Бөек Ватан сугышында Җиңүгә нинди өлеш кертүләре турында белергә мөмкин. 1941-1945 елларда ТАССР башкаласында 139 сәнәгать предприятиесе хәрби җайга үзгәртеп корыла, тагын 70 предприятие илнең үзәк һәм көнбатыш төбәкләреннән эвакуацияләнә. Предприятиеләрдә Кызыл Армия ихтыяҗлары өчен 600-дән артык исемдәге корал, сугыш кирәк-яраклары әзерләнгән.

Шәһәр халкы Казанга мактаулы хезмәт батырлыгы шәһәре исемен бирү инициативасын хуплый ала. Исегезгә төшерәбез, элегрәк ТР Дәүләт Советы депутатларына Казан Мэры Илсур Метшин шундый тәкъдим белән мөрәҗәгать иткән иде. Татарстан парламентарийлары тәкъдимне хуплады һәм Россия Президенты адресына Татарстан башкаласына «Хезмәт батырлыгы шәһәре» исемен бирү турында гариза җибәреләчәк.

Казанлыларны шулай ук үз герой тыл хезмәтчәннәре турында - сугыш елларында шәһәр предприятиеләрендә эшләгән, Кызыл Армия өчен продукция чыгарган, фәнни эшләнмәләр алып барган, госпитальләрдә сугышчыларның гомерләрен саклап калган, хәрби кадрлар әзерләгән туганнары турында сөйләргә чакыралар. Иң якты тарихлар kzn.ru порталы битләрендә урын алачак.

Шулай ук укыгыз

Барлык яңалыклар