ТРда эшкә вакытлыча яраксызлык кәгазьләре буенча түләүләргә ел башыннан 4 млрд сум акча юлланган

Түләүләр барлыгы 298 меңнән артык эшкә вакытлыча яраксызлык кәгазе буенча башкарылган

Фото: Марат Мөгыйнов

Татарстанда электрон формада рәсмиләштерелгән эшкә вакытлыча яраксызлык кәгазьләре буенча ел башыннан 298 меңнән артык түләү башкарылган. Әлеге максатлар өчен 4 млрд сум акча юнәлтелгән.

Эшкә вакытлыча яраксызлык кәгазе – кеше үзе авырган очракта яки, якын туганы авыру сәбәпле, аны карау белән бәйле рәвештә эшли алмаса бирелә торган документ. Мондый ситуацияләрдә гражданинга вакытлыча эшкә яраксызлык буенча пособие тиеш. 2022 елдан документ электрон форматта тутырыла.

Эшкә вакытлыча яраксызлык кәгазе белән бәйле мәгълүматны дәүләт хезмәтләре порталындагы шәхси кабинетта күрергә мөмкин. Сайтта эшкә вакытлыча яраксызлык кәгазен ачу, озайту, ябу, билгеләнгән пособие күләме һ.б. турында белешмәләр күрсәтелә. Ә пособиене мөрәҗәгатьләрсез һәм документлар тапшырмыйча гына да алырга була. Ул эшкә вакытлыча яраксызлык кәгазе ябылганнан соң, РФ Социаль фонды тарафыннан эш бирүчедән кирәкле мәгълүмат алынгач, 10 көн эчендә билгеләнә.

Документның электрон форматы оешмаларның да эшен җиңеләйтә. Алар мәгълүматны цифрлы рәвештә ала, бу исә кәгазь эше күләмен һәм документларда хата җибәрү ихтималын киметә, дип хәбәр итә РФ Социаль фондының ТР буенча бүлекчәсе матбугат хезмәте.

Өстәмә мәгълүматны +7(800)100-00-01 телефон номеры буенча алырга мөмкин.

Шулай ук укыгыз

Барлык яңалыклар