Бер көнгә Казан Мэриясе бинасы балконнары театр сәхнәсенә әйләнәчәк

Театр һәм кино актрисасы Екатерина Климова оркестр белән бергә шигырьләр укыячак.

Фото: Денис Гордийко

(Казан шәһәре KZN.RU, 15 нче август, Зилә Гайфи). 27 нче августта Татарстан башкаласында кабат «Голоса Казани / Казан тавышлары» шигъри перформансы узачак. Шәһәр Мэриясе бинасы балконыннан шигырьләрне Казан театрларының әйдәп баручы актерлары, шулай ук театр һәм кино актрисасы Екатерина Климова укыячак. Бу хакта бүгенге эшлекле дүшәмбе вакытында Казан Башкарма комитеты җитәкчесе урынбасары Гүзәл Сәгыйтова хәбәр итте.

Перформанс «Яңа музыка» оркестры озатуында башкарылачак, Г.Камал, К.Тинчурин, В.Качалов, Яшь тамашачылар театры һәм Кариев исемендәге яшь тамашачылар театры актерлары татар һәм рус телләрендә чыгыш ясаячак. Шулай ук тамашачыларга видео-мэппинг-тамаша күрсәтәчәкләр – бинаның диварларын төрле төстәге утлар һәм әкияти рәсемнәр бизәячәк. Тамаша 20:00 сәгатьтә башлана, дип хәбәр итте Гүзәл Сәгыйтова.

Поэзия һәм прозаны быел яңа мәйданчыкларда – Аксенов скверында һәм «Черек күл» паркында узачак «Аксенов-фест»та да тыңларга мөмкин булачак. Шулай итеп, 20 нче август көнне 19:00 сәгатьтә «Черек күл»дә язучының 90 еллыгына багышланган «Нынче детство мне явилось...» әдәби-музыкаль сәяхәт чарасы оештырылачак. Фестивальнең төп уздыру урыны Аксенов музей-йорты булачак, чаралар шулай ук ТР Милли китапханәсендә һәм Яшь тамашачылар театры бинасында узачак. «Аксенов-фест»ның тулы программасы KZN.RU порталының махсус бүлегендә тәкъдим ителде.