Адмиралтейство бистәсе буйлап чираттагы экскурсиядә казанлыларга Бишбалта мәчетләре турында сөйләячәкләр

Экскурсиядә катнашучылар бистә территориясендә яшәгән татар мәгърифәтчеләре һәм мәдәният эшлеклеләре турында беләчәк.

Фото: Киров һәм Мәскәү районнары хакимияте

(Казан шәһәре KZN.RU, 20-нче ноябрь). 22-нче ноябрьдә Казанда «Бишбалта һәм/яки Адмиралтейство бистәсе: территориянең татар коды» темасына экскурсия узачак.

Туган якны өйрәнүче, тарихчы, Бөтендөнья татар яшьләре форумы рәисе урынбасары Айрат Фәйзрахманов Бишбалта тарихы, аның мәчетләре, татар мәгърифәтчеләре һәм бистә территориясендә яшәүче мәдәният эшлеклеләре турында сөйләячәк. Экскурсия маршруты Карелия һәм Брюсов урамнары аша Бишбалта мөселман зиратына кадәр уза. Шәһәр халкы һәм кунаклары бистәнең тарихи мәчетләре урнашкан урыннарны һәм хәзер Бишбалта мәчетенең кайда урнашуын күрә алачак. Маршрут шулай ук Столяров паркын һәм Балыкчы бакчасын, бетерелгән Тиволи паркы урынын һәм Мало-Московская урамын колачлаячак.

Экскурсия 10.00 сәгатьтә башлана. Катнашу өчен СМС яки Whatsapp аша +7(951)061-00-28 телефоны буенча язылырга кирәк, дип хәбәр итә оештыручылар.

Шулай ук укыгыз

Барлык яңалыклар