Казансу яр буенда 28 сентябрьдә икенчел чимал кабул итү мобиль пункты эшләячәк

Акция Миллениум күпере астында узачак

Казансу яр буенда 28 сентябрьдә икенчел чимал һәм кием кабул итү мобиль пункты ачылачак. Шәһәрлеләрне 10:00 нан 12:00 гә кадәр көтәчәкләр.

«ЭкоЛогично» проекты волонтерлары яхшы киемнәр, китаплар һәм журналлар, кәнсә товарлары, шулай ук пластик, металл, техника, фольга, макулатура һәм икенчел чималның башка төрләрен кабул итәчәк. Тулы исемлек белән сылтама буенча танышырга була.

Өстәмә рәвештә бушлай әйберләр белән алмашу базарында ватык зонтиклар, ПВХ-папкалар, чәчәк чүлмәкләре, ватылган керамика, хушбуй һәм дарулардан пыяла банкалар калдырырга мөмкин булачак.

Шул ук вакытта шәһәрлеләрдән аудио һәм видеокассеталар, музыкаль пластинкалар, полистирол, аяк киемнәре һәм чүпрәк, су сөзгечләре, уенчыклар, батареялар, лампалар һәм градус үлчәгечләр кабул ителмәячәк.

Оештыручылар хәбәр иткәнчә, акциядә катнашучылар теләгән супермаркет картасына 50 бонус (1 бонус 1 сумга тигез) алачак. Моның өчен мәйданчыкта QR-кодны сканерлау кирәк булачак.

2026 ел ахырына кадәр акцияләр һәр ай саен узачак. Акция «Казансуны үстерү стратегиясе», Парклар һәм скверлар дирекциясе, Казан мэриясе һәм «Татнефть» ГАҖ грантлары ярдәмендә «ЭкоЛогично» хәрәкәте тарафыннан оештырылды.

Шулай ук укыгыз

Барлык яңалыклар