Монастырь ермагы аша уза торган күпердә трамвай рельсларын салдылар

Зур Казан боҗрасының икенче этабын төзү дәвам итә.

(Казан шәһәре KZN.RU, 19-нчы август). Татарстан башкаласында Борисково урамыннан Техника урамына кадәрге участокта Зур Казан боҗрасының икенче этабын төзү дәвам итә. Узган атнада Монастырь ермагы аша уза торган күпердә гидроизоляция ясалды һәм трамвай хәрәкәте астына бетонның саклык катлавы түшәлде.

Шулай ук күпердә вак таштан балластлы тагарак урнаштыру, планлы һәм биеклек хәлендә трамвай юлларының рельс-шпаль рәшәткәләрен салу башкарылды, трамвай челтәренең терәкләрен монтажлау дәвам итә.

Узган атнада объектта җир өеме һәм юл катламы формалаштырылды. 4900 кв.м мәйданда юл өслегенең түбән катламы һәм 6200 кв.м мәйданда асфальт-бетоннан югары катлам салынган. 1340 кв.м мәйданда тротуарлар төзелгән, 999 метр борт ташы монтажланган.

Моннан тыш, эшчеләр күпер пролетлары астында коммуникацияләр салуны төгәлләде. Бу юлчыларга алга таба хәрәкәтне Прибрежная, Горийская һәм Запорожье урамнары буенча җирле юлларда даими схема буенча яңадан эшләтеп җибәрү өчен күпер астында машиналар урнаштыруга керешергә мөмкинлек бирде. Бер атнада 800 метр озынлыкта яңгыр канализациясе торбалары сузылды.

Объектта шулай ук уң һәм сул юл буйларында тавыш саклагыч экраннар төзү эшләре башкарылган.

Зур Казан боҗрасының икенче этабы төзелешендә узган атнада 107 кеше инженер-техник персонал һәм 20 берәмлек махсус техника эшләде, дип хәбәр итә ТР Транспорт һәм юл хуҗалыгы министрлыгы матбугат хезмәте.

Исегезгә төшерәбез, Борисково урамыннан Техника урамына кадәр 1,222 чакрым озынлыктагы юл участогын төзү «Имин һәм сыйфатлы автомобиль юллары» илкүләм проекты буенча алып барыла. Зур Казан боҗрасы төзелешенең икенче этабы кысаларында проект документациясендә коммуникацияләрне яңадан урнаштыру, яңгыр канализациясе һәм чистарту корылмалары, терәк дивардар, светофор объектлары, тышкы яктырту системалары урнаштыру, трамвай юллары төзү каралган. Монастырь ермагы аша 70,78 м озынлыктагы күпер салыначак.

Шулай ук Зур Казан боҗрасы төзелешенең беренче этабы да дәвам итә: Мидхәт Булатов урамыннан Борисково урамына кадәр 800 м озынлыктагы участокта Ферма шоссесы өстеннән юлүткәргеч һәм җир асты кичүе булган дүрт полосалы юл төзелә.

Исегезгә төшерәбез, Казанда Зур Казан боҗрасы төзелеше барышында Россиядә иң озын трамвай маршруты барлыкка киләчәк. Хәрәкәтне август ахырында ачу планлаштырыла, линиягә 18 яңа бер секцияле һәм өч секцияле трамвай чыгачак, алар Зур Казан боҗрасы буенча 5-нче һәм 5а «Тимер юл вокзалы – «Солнечный город» микрорайоны маршрутларында йөриячәк.

Шулай ук укыгыз

Барлык яңалыклар