Казанның Мәскәү базарында фламенко кичәсе узачак

Программада: испан теле дәресләре, фламенко буенча мастер-класс, шулай ук паэлья һәм сангрия

Казандагы Мәскәү базары амфитеатрында 15 июльдә фламенко кичәсе узачак. Казанлылар өчен испан теленнән ачык дәрес, фламенко мәктәбеннән мастер-класс үткәреләчәк һәм испан ризыклары белән сыйланачак.

Испан теленең ачык дәресе 18:00 дә башлана. Кунаклар тиз сөйләшү өчен гыйбарәләрне өйрәнәчәк һәм тел нигезләрен аңлаячак, дип хәбәр итә предприятиенең матбугат хезмәте.

18:35 сәгатьтә фламенко мәктәбеннән мастер-класс башлана. Казанлылар өчен мәктәп укучылары чыгыш ясаячак, аннан соң кунакларга да кызу биюдә әйләнергә тәкъдим итәчәкләр.

Кичне испан ризыклары озата барачак. Кунаклар испан паэльясын һәм алкогольсез сангрияне авыз итәчәк. Мастер-класслар арасында перкуссионист Руслан Исхаков һәм гитарачы Айдар Абдрахимов чыгыш ясаячак.

Барлык теләүчеләрне Мәскәү базары амфитеатрына 18:00 гә чакыралар.

Элегрәк хәбәр ителгәнчә, «Черек күл» паркында 12 июльдә GreenMarket зур чәчәкләр фестивале узачак. Казанлылар үзләренә үсемлек сатып ала, мастер-классларда һәм төрле чәчәкләр белән алмашу базарында катнаша, шулай ук ачык лекторийда була алачак.

Шулай ук укыгыз

Барлык яңалыклар