«КышДаКар-фест»та эшмәкәрләр 6 млн сумга якын продукция саткан

Фестиваль «Казан» гаилә үзәге янындагы төп чыршы янында һәм Бауман урамында узды.

Фото: Казан шәһәре KZN.RU

(Казан шәһәре KZN.RU, 10 нчы гыйнвар, Алсу Сафина). Яңа ел бәйрәмнәрендә казанлылар һәм шәһәр кунаклары өчен иң популяр күңел ачуларның берсе «КышДаКар-фест» ярминкәсенә бару булды. Фестивальдә катнашкан эшмәкәрләр 6 млн сумга якын продукция саткан. Бу хакта Башкарма комитеттагы аппарат киңәшмәсендә Туризмны үстерү комитеты директоры Дарья Санникова хәбәр итте.

Быел фестиваль берьюлы ике мәйданчыкта узды: «Казан» гаилә үзәгендә урнашкан шәһәрнең төп чыршысы янында һәм Бауман урамында. Һәр көнне фестивальгә килүчеләр төрле мастер-классларда һәм призлар уйнатуда катнаша алды. «Фестиваль кече һәм урта бизнес өчен уздырылды һәм күп кенә катнашучылар өчен үз продукцияләрен сату өчен яхшы мөмкинлек булды», - дип ассызыклады Д.Санникова.

4 нче гыйнварда Татарстан башкаласына «Повара на колесах» төбәкара проектының махсус фуд-тракы килде. «Мәскәүнең иң яхшы шеф-пешекчеләре Россия төбәкләре буйлап сәяхәт итә, җирле продуктлардан аш әзерлиләр һәм халык өчен дегустация үткәрәләр», – дип сөйләде проект турында Туризмны үстерү комитеты директоры. Аннары болар барысы да Беренче каналдагы пешекчеләрнең «Повара на колесах» тапшырулар циклында чыга.

«КышДаКар-фест» мәйданчыгы каршында «Казан» гаилә үзәге янында Мәскәү рестораннарының шеф-пешекчеләре Сергей Лазарев һәм Андрей Палесика бушлай гастрономия дегустациясе үткәрделәр. Аннан соң кунакларга Казан пешекчесе Эмиль Фәйзуллин да кушылды, ул үз интерпретациясендә әзерләнгән кыстыбыйга дегустация уздырды.