Казан ипподромында Сабантуй хөрмәтенә 135 чиста канлы чабышкы атлар стартка чыкты

Призлар өчен Татарстан, Мәскәү, Оренбург, Чиләбе, Пенза өлкәләре, Ставрополь һәм Пермь крае спортчылары көрәште

Фото: Денис Гордийко

(Казан шәһәре KZN.RU, 23 нче июнь). Бүген Казан ипподромында татар халкының милли Сабантуй бәйрәме уңаеннан ат чабышлары узды. Ярышларны Татарстан Республикасы Рәисе Рөстәм Миңнеханов һәм шәһәр Мэры Илсур Метшин күзәтте. ТР башкаласында яшәүчеләр һәм кунаклар өчен спорт программасы белән беррәттән мәдәни программа да әзерләнгән иде.

Ат чабышы көненең программасында 8 чабыш һәм 6 узыш булды. Ярышларга 135 гарәп, татар һәм юртак токымлы чиста канлы чабышкы атлар чыкты. Барлыгы 14 бүләк уйнатылды. Катнашучылар арасында Татарстан, Марий Эл, Удмуртия, Чуваш Республикасы, Башкортстан, Самара, Оренбург, Мәскәү, Чиләбе, Ульяновск, Пенза, Тула, Киров өлкәләре, Ставрополь һәм Пермь крае, шулай ук Мәскәү спортчылары бар иде. Шулай ук тамашачыларга арбалы понилар ярышын күрсәттеләр.

Бәйрәм чаралары ТР Авыл хуҗалыгы һәм азык-төлек министрлыгы ярдәме белән оештырылган – ипподромда республика авыл хуҗалыгы товарлары җитештерүчеләренең продукциясе күргәзмәсе уза, дип хәбәр иттеләр ТР Рәисе матбугат хезмәтендә.

Исегезгә төшерәбез, Казанда Сабантуй бәйрәме өч мәйданчыкта узачак. Үзәк мәйдан Идел буе районының Мирный поселоыгындагы Каенлыкта булачак – кунакларны республиканың 11 районыннан иҗади программа һәм төрле мастер-класслар көтә. Шулай ук Сабантуй Совет районының Дәрвишләр поселоыгының Каенлыгында һәм Киров районының Аккош күле урман паркы территориясендә узачак. Тулы программа белән KZN.RU порталының махсус бүлегендә таныша аласыз.

Фоторепортаж

Казан ипподромында Сабантуй хөрмәтенә уздырылган ат чабышлары

Шулай ук укыгыз

Барлык яңалыклар