Качалов театр фестивалендә тамашачыларга «Анна Каренина» һәм «Старуха»ны күрсәтәчәкләр

Казан театрының 230 еллыгы уңаеннан фестиваль «Петр Фоменко остаханәсе»ннән спектакль белән ачылачак.

Фото: Денис Гордийко

(Казан шәһәре KZN.RU, 18-нче август). 2-нче октябрьдән 22-нче октябрьгә кадәр Казанда Качалов исемендәге театрның 230 еллыгына багышланган Качалов театр фестивале узачак. Фестивальдә Россиянең танылган театр сәнгате осталарының рус әдәбияты әсәрләре буенча куелган спектакльләре белән илнең әйдәп баручы театрлары катнаша.

2-нче һәм 3-нче октябрьдә Лев Толстойның «Семейное счастие» повесте буенча сәхнә композициясен «Петр Фоменко остаханәсе» (Мәскәү) тәкъдим итәчәк. Режиссеры – Петр Фоменко.

12-нче һәм 13-нче октябрьдә «Театр сәнгате студиясе» (Мәскәү шәһәре) Даниил Хармс әсәре буенча куелган «Старуха» постановкасын күрсәтәчәк, ул язучының үзе тарафыннан «фикерләрнең логик булмаган агымы» дип бәяләнгән. Режиссеры – Сергей Женовач.

19-нчы һәм 20-нче октябрьдә «Балтыйк йорты» театр-фестивале (Санкт-Петербург шәһәре) Казан тамашачыларына Лев Толстойның «Анна Каренина» романы буенча Елена Греминой пьесасын күрсәтәчәк. Режиссеры – Александр Галибин.

22-нче октябрьдә В.И.Качалов исемендәге Казан академия рус Зур драма театры Максим Горькийның «Васса» әсәре буенча спектакль тәкъдим итәчәк. Бу режиссер Александр Славутский куелышындагы ике пәрдәдән торган бер гаилә тарихы.

Качалов фестиваленең рәсми программасына мастер-класслар, иҗади очрашулар, конференцияләр, түгәрәк өстәлләр кертелгән, дип хәбәр итә ТР Мәдәният министрлыгы матбугат хезмәте.

Шулай ук укыгыз

Барлык яңалыклар