«Казаныш» форумында 2023 елның иң яхшы торак комплексы һәм социаль объекты аталачак

Чарада 11 номинациядә архитектура конкурсында җиңүчеләр игълан ителәчәк

Фото: Денис Гордийко

(Казан шәһәре KZN.RU, 30 нчы ноябрь). 5 нче декабрьдән 7 нче декабрьгә кадәр узачак «Казаныш» халыкара архитектура-төзелеш форумында шәһәр архитектура проектлары конкурсында җиңүчеләр һәм призерлар игълан ителәчәк. 11 номинация буенча нәтиҗәләр ясалачак: «Иң яхшы торак комплекс», «Иң яхшы шәхси торак йорт», «Иң яхшы коммерцияле күчемсез милек объекты», «Иң яхшы социаль объект» һ.б. Тиешле карар Казанның Документлар һәм хокукый актлар җыентыгында бастырылган.

Быел конкурста катнашу өчен 142 гариза килгән. Алар өч категориядә тәкъдим ителде: тормышка ашырылган объектлар, шәһәр Башкарма комитетының Архитектура һәм шәһәр төзелеше идарәсе белән килешенгән, әмма тормышка ашырылмаган проектлар, шулай ук тормышка ашырылмаган һәм килешенмәгән идеяләр. Казан халкы тавыш бирүдә актив катнашты, шуннан соң жюри үз фикерен җиткерәчәк.

Исегезгә төшерәбез, узган ел конкурста катнашу өчен 41 нче компаниядән 126 гариза бирелгән иде. Гамәлгә ашырылган объектлар категориясендә Павлюхин урамындагы гаилә ялы үзәге, Бәшир Рәмиев исемендәге ИТ-парк һәм Atlantis Deluxe торак комплексы (архитектура яктыртуы) гран-при алды. Җиңүчеләргә бүләкләрне Казан Мэры Илсур Метшин тапшырды.

«Казаныш» форумы ТР башкаласында 5 нче декабрьдән 7 нче декабрьгә кадәр Камал театры мәйданчыгында узачак. Чарага 20 дәүләт вәкиле чакырылган, спикерлар арасында дөньякүләм танылган шәһәр төзүчеләр һәм Россиянең әйдәп баручы архитекторлары бар. Форум БРИКС саммиты алдыннан үткәрелә.

Шулай ук укыгыз

29.04.2025, 17:56

Татарстанда 23 м/с ка кадәр көчле җил көтелә
29.04.2025, 17:11

Сак булыгыз, талпаннар! Яз башыннан Татарстанда 864 талпан тешләве теркәлгән
29.04.2025, 16:43

Казанда Копылов урамында транспорт хәрәкәтен өлешчә чикләячәкләр
29.04.2025, 16:02

Казанга «Җиңү поезды» мемориаль составы киләчәк

Барлык яңалыклар