Казанда «Звучащий Дом Софии» фестивалендә 25 илдән композиторларның әсәрләрен башкарачаклар

Концертлар берничә мәйданчыкта узачак, алар арасында MON һәм «Мәскәү» мәдәният үзәге дә бар

Фото: Марат Мөгыйнов

(Казан шәһәре KZN.RU, 18 нче октябрь). Казанда 24 нче октябрьдән 1 нче декабрьгә кадәр XIV Халыкара «Звучащий Дом Софии» фестивале узачак. Программага 25 илдән яшь композиторларның әсәрләре кертелгән, аларны Россиянең танылган музыкаль коллективлары башкарачак.

Быел фестивальгә Мәскәү заманча музыка ансамбле, Мәскәү консерваториясенең электроакустик музыка үзәге ансамбле, И.Гнесиннар исемендәге Reheard РАМ ансамбле, Fixed media чакырылган. Шулай ук сәхнәгә С.Гобәйдуллинаның заманча музыка үзәге оркестры, солистлар Фәридә Нуруллаева (орган) һәм Никита Петяев (туба) чыгачак.

Концертлар С.Гобәйдуллина исемендәге үзәктә, Казан консерваториясе, ТР Композиторлар берлеге, Изге Екатерина чиркәве һәм шәһәрнең креатив киңлекләрендә – MON театр мәйданчыгы, «Мәскәү» мәдәният үзәгендә узачак. Афишаны сылтама буенча карарга мөмкин.

Фестиваль программасында «Гобәйдуллина укулары» IV фәнни конференциясе, композитор Марк Булошников белән иҗади очрашу һәм Мәскәү заманча музыка ансамбленнән мастер-класслар көтелә.

«Звучащий Дом Софии» фестивале хәзерге заманның танылган композиторларының берсе София Гобәйдуллинаның туган көненә багышлана, дип искәртә оештыручылар.

Шулай ук укыгыз

Барлык яңалыклар