«Тәпиеңне бир» фестивалендә казанлылар приюттан хайван сайлый алачак

Чара программасында – ветеринарлар, кинологлар һәм зоопсихологлардан лекцияләр, этләр белән мастер-класслар һәм фотосессия.

Фото: Денис Гордийко

(Казан шәһәре KZN.RU, 27-нче август). 29-нчы августта Казанның Горький исемендәге паркында «Тәпиеңне бир» хәйрия чарасы узачак. Барлык теләүчеләр Казанның «Зооцентр» йортсыз хайваннар өчен приютындагы этләр белән таныша, алар белән йөри һәм уйный, шулай ук ошаган дүрт аяклы дусны өйләренә ала алачак. Акция паркның яшел кырында 11:00 сәгатьтән 15:00 сәгатькә кадәр узачак.

Барлык хайваннарның да тиешле прививкалары бар. Хайванны өйгә алучылар өчен оештыручылардан бүләкләр каралган, дип хәбәр итә Казанның Парклар һәм скверлар дирекциясе. Моннан тыш, фестивальгә үз хайваннары белән килүче барлык эт хуҗалары хайваннар өчен банданалар һәм исемле бейджлар ала алачак.

Акция яңа дустын табарга теләүчеләргә дә, инде хайваннары булган кешеләргә дә файдалы булачак. Ветеринарлар, кинологлар, зоопсихологлар хайваннарны карау буенча киңәшләр бирәчәк. Ветеринар Юлия Богатырева «Мин хайван алдым. Алга таба нәрсә?» лекциясе белән чыгыш ясаячак, ә кинолог Регина Мөхәммәтханова приюттан эт алу өчен ничек әзерләнергә кирәклеге турында сөйләячәк. Шулай ук аның этенең күрсәтмә чыгышы да булачак. «Менә дигән эт» этләрне дрессировкалау мәктәбенә нигез салучы Анастасия Костенко тыңлаучылар белән эт белән дөрес аралашу буенча киңәшләре белән уртаклашачак, ә кинолог Мария Хәйруллина приютлардан этләрне тәрбияләү һәм дрессировкалау үзенчәлекләре турында сөйләячәк. Фестиваль программасында шулай ук рәсем ясау, хайван сыннарын тудыру буенча балалар мастер-класслары, хайваннар белән фотосессия һәм этнең күрсәтмә чыгышлары булачак.

Чара мәйданчыгында хәйрия ярминкәсе эшләячәк, җыелган акчаның бер өлеше приютка ярдәм буларак биреләчәк. Моннан тыш, приют өчен азык һәм башка кирәкле әйберләрне алып килергә һәм барысын да «яхшылык өстәлендә» калдырырга мөмкин булачак. Хайваннарны бушлай вакцинацияләү пункты эшләячәк. Этләр өчен су белән ял итү өчен аерым зона оештырылачак.

Исегезгә төшерәбез, хайваннарга җаваплы карау мәсьәләләренә багышланган түгәрәк өстәлдә Казан Мэры Илсур Метшин үзенә приюттан хайван алырга әзерлеге турында белдерде.

Шулай ук укыгыз

Барлык яңалыклар