Бу атнада Татарстанда +11 градуска кадәр җылыта

Һаваның уртача температурасы нормадан 6-8 градуска югарырак булачак.

Фото: Денис Гордийко

(Казан шәһәре KZN.RU, 20 нче март). Якын көннәрдә Татарстанда һава торышы әкренләп үзгәрәчәк. Синоптиклар явым-төшемнәр һәм шактый җылытачагын фаразлый.

21 нче мартта Казанда аязучан болытлы булачак. Төнлә урыны белән бераз җепшек кар булырга мөмкин, һава температурасы 0 дән +2 градуска кадәр тәшкил итәчәк. Көндез урыны белән бераз яңгыр һәм 6-8 градуска кадәр җылытачак дип көтелә. Юлларда бозлавык барлыкка килергә мөмкин.

22 нче мартта төнге сәгатьләрдә Татарстанда урыны белән җепшек кар белән бераз яңгыр көтелә, көндез җитди явым-төшем көтелми. Төнге температура 0 дән +3 градуска кадәр тәшкил итәчәк, көндез һава +4-9 градуска кадәр җылыначак.

23 нче мартта да яңгырлар көтелми. Төнлә минус 3 градуска кадәр суытачак, ә көндез термометр баганалары +6-11 градуска кадәр күтәреләчәк.

Республикада җылы һава торышы 24-26 нчы март көннәрендә сакланачак. Уртача температура нормадан 6-8 градуска югарырак булачак. Көндез синоптиклар +6-11 градуска кадәр җылытачак дип вәгъдә итәләр, төнлә дә уңай һава температурасы фаразлана. ТР Гидрометеорология үзәгенең фаразыннан күренгәнчә, вакыт-вакыт яңгырлар булырга мөмкин.

Шулай ук укыгыз

Барлык яңалыклар