Зур Казан боҗрасында даими схема буенча троллейбус хәрәкәте ачылды

Зур Казан боҗрасы төзелешенең беренче этабы барышында җир өсте җәяүлеләр кичүен урнаштыру төгәлләнеп килә.

(Казан шәһәре KZN.RU, 27-нче июль). ТР башкаласында Зур Казан боҗрасының беренче этабын төзү дәвам итә. Узган атнада төзүчеләр, даими схема буенча тоташтырып, троллейбус контакт челтәрен һәм тышкы яктыртуны урнаштыру эшләрен төгәлләделәр. Шулай ук объектта тротуарлар тулысынча төзелеп бетте.

Узган атнада Ферма шоссесы өстеннән уза торган юлүткәргечтә автомобиль юлының уң һәм сул як өлешендәге пролет корылмаларда рәшәткә һәм киртәле коймалар урнаштыру, шулай ук терәкләрнең берсенең суүткәргеч лотокларын һәм суүткәргеч торбаларын урнаштыру эшләре тәмамланды.

Моннан тыш, Борисково урамы буенча җир өсте җәяүлеләр кичүе төзелеше төгәлләнеп килә. Аерым алганда, баскыч урыннарында тәгәрмәч белән төшү юллары һәм авыш күтәрмәләр белән стойкалар урнаштырылган, 597 кв.м мәйданлы барлык җәяүлеләр өлешендә таушалуга тотрыклы идән өслеге җәелгән.

Объектта сул һәм уң съездларда юл полотносы, шулай ук терәк диварлары арасында төп юл төзелеше дәвам итте. Төзүчеләр 28 мең 100 кв.м мәйданда вак таш-мастик асфальт-бетоннан өслекнең өске катлавын салганнар. Шулай ук «Борисково урамы» тукталышында тукталыш павильоннарын монтажлау да башкарылган.

Узган атнада Зур Казан боҗрасының беренче этабын төзүдә барлыгы 68 белгеч һәм 13 махсус техника җәлеп ителде, дип хәбәр итә ТР Транспорт һәм юл хуҗалыгы министрлыгы матбугат хезмәте.

Исегезгә төшерәбез, Зур Казан боҗрасының беренче этабы 2019 елның июлендә «Имин һәм сыйфатлы автомобиль юллары» илкүләм проекты буенча төзелә башлады. Мидхәт Булатов урамыннан алып Борисково урамына кадәрге 800 м озынлыктагы участокта Ферма шоссесы өстеннән юлүткәргеч һәм җир асты кичүе булган дүрт полосалы юл төзелә.

Төзелешнең икенче этабы - Борисково урамыннан Техника урамына кадәрге участокта - мартта башланып китте. Участокның озынлыгы 1,22 чакрым тәшкил итә. Дүрт полосалы юл һәр юнәлештә ике полоса белән беренче класслы гомумшәһәр әһәмиятендәге магистраль урам категориясе буенча проектланган. 700 м озынлыктагы участокны 2020 елда, ә 522 м озынлыктагы участокны 2021 елда кулланылышка кертү планлаштырыла.

Шулай ук укыгыз

Барлык яңалыклар